راکھی ساونت کی خانہ کعبہ کے سامنے خصوصی دعا، ویڈیو وائرل
راکھی ساونت نے اپنی انسٹاگرام پوسٹ میں نیپال میں سیلاب اور طوفان سے متاثرہ افراد کی سلامتی اور قدرتی آفت کے خاتمے کیلئے خصوصی دعا کی۔ اداکارہ نے اپنی دعا میں بچوں، بزرگوں اور جانوروں کی حفاظت کیلئے بھی اللہ تعالیٰ سے مدد مانگی۔
ویڈیو میں راکھی ساونت نے دعا کرتے ہوئے کہا کہ اللہ تعالیٰ نیپال میں آنے والے سیلاب اور طوفان کو روک دے اور وہاں موجود بچوں، بزرگوں اور جانوروں کو محفوظ رکھے۔ انہوں نے نیپال اور بھارت سے تعلق رکھنے والے ان شہریوں کی سلامتی کیلئے بھی دعا کی جو سیلابی صورتحال کے باعث مختلف علاقوں میں پھنسے ہوئے ہیں۔
راکھی ساونت کی جانب سے شیئر کی گئی ویڈیو سوشل میڈیا پر توجہ کا مرکز بن گئی، جہاں صارفین نے نیپال کے سیلاب متاثرین کیلئے ان کی ہمدردی اور نیک خواہشات کو سراہا۔
اداکارہ عام طور پر اپنی بے باک اور منفرد شخصیت کے باعث خبروں میں رہتی ہیں، تاہم اس بار انہوں نے قدرتی آفت سے متاثرہ افراد کیلئے فکر مندی اور ہمدردی کا اظہار کیا ہے۔
دوسری جانب نیپال اور چین کے متاثرہ علاقوں میں امدادی کارروائیاں جاری ہیں، ریسکیو ٹیمیں سیلاب اور ملبے کے باعث لاپتا ہونے والے افراد کی تلاش میں مصروف ہیں، جبکہ کئی علاقوں میں اچانک آنے والے پانی اور ملبے کے ریلوں نے بڑے پیمانے پر تباہی مچائی ہے۔
یہ بھی پڑھیں:کینسر کی تشخیص کے بعد نعمان اعجاز نے کیا دعا مانگی؟
نیپالی حکام کے مطابق سرحدی علاقے میں آنے والے تباہ کن سیلاب کے باعث اموات کی تعداد 734 تک پہنچ گئی ہے، جبکہ امدادی کارروائیوں کا سلسلہ بدستور جاری ہے۔
