معروف گلوکار انکت بالیان جم سے باہر نکلتے ہی قتل
بھارتی میڈیا کے مطابق افسوسناک واقعہ بدھ کی شام کوتوالی تھانے کی حدود میں پیش آیا، جہاں دو موٹر سائیکلوں پر سوار مسلح حملہ آوروں نے انکت بالیان کو نشانہ بنایا۔ حملہ آوروں نے ان پر متعدد گولیاں چلائیں، جس کے نتیجے میں وہ موقع پر ہی دم توڑ گئے۔
رپورٹس کے مطابق انکت بالیان پر 18 گولیاں چلائی گئیں، تاہم پولیس کی جانب سے فائر کیے گئے گولیوں کی تعداد کی باضابطہ تصدیق سامنے نہیں آئی۔
پولیس نے واقعے کے بعد مقتول کی لاش پوسٹ مارٹم کیلئے بھجوا دی جبکہ ملزمان کی گرفتاری کیلئے مختلف ٹیمیں تشکیل دے دی گئی ہیں۔ تفتیشی حکام علاقے میں نصب سی سی ٹی وی کیمروں کی ریکارڈنگ کا بھی جائزہ لے رہے ہیں تاکہ حملہ آوروں کی شناخت کرکے انہیں گرفتار کیا جاسکے۔
واضح رہے کہ انکت بالیان سوشل میڈیا پر بھی خاصے مقبول تھے، ان کے یوٹیوب چینل کے سبسکرائبرز کی تعداد 3 لاکھ 66 ہزار سے زائد تھی۔ وہ اپنی ویڈیوز میں متعدد معروف گلوکاروں، فنکاروں اور پرفارمرز کے ساتھ نظر آتے تھے۔
یہ بھی پڑھیں:نیپال میں سیلاب نے تباہی مچا دی، متعدد افراد ہلاک، 484 سیاح لاپتا
ان کی متعدد ویڈیوز میں اسلحہ، فائرنگ اور مہنگی گاڑیاں بھی دکھائی دیتی تھیں۔
بھارتی میڈیا میں یہ قیاس آرائیاں بھی سامنے آئی ہیں کہ انکت بالیان آئندہ پنچایتی انتخابات میں حصہ لینے کی تیاری کررہے تھے، تاہم پولیس یا ان کے قریبی ساتھیوں نے اس کی تصدیق نہیں کی۔
