مشہور ٹک ٹاکر اختر لاوا کیخلاف مقدمہ درج
واقعہ لاہور کے علاقے سبزہ زار میں پیش آیا، جہاں ٹریفک پولیس نے ون وے کی خلاف ورزی کرنے والی گاڑی کو روک کر کارروائی شروع کی۔
ٹریفک پولیس کے مطابق کریم مارکیٹ سے کھاڑک نالہ جانے والے ون وے روڈ پر ایک کار نے ٹریفک قوانین کی خلاف ورزی کرتے ہوئے ممنوعہ راستے میں داخل ہونے کے ساتھ ساتھ ٹریفک سگنل بھی نظر انداز کیا۔ قوانین کی خلاف ورزی پر وارڈنز نے گاڑی کو چالان کیلئے روکا۔
پولیس کا کہنا ہے کہ گاڑی رکنے کے بعد ڈرائیور مشتعل ہوگیا اور ٹریفک اہلکاروں کی ویڈیو بنانا شروع کر دی، صورتحال کشیدہ ہونے پر مزید نفری طلب کی گئی، تاہم پولیس کے پہنچنے سے قبل ملزم اپنا موبائل فون موقع پر چھوڑ کر فرار ہو گیا۔
تحقیقات کے دوران موقع پر ملنے والے شواہد اور ابتدائی معلومات کی بنیاد پر ڈرائیور کی شناخت مبینہ طور پر معروف ٹک ٹاکر اختر لاوا کے نام سے ہوئی، جس کے بعد ان کے خلاف ٹریفک پولیس کی مدعیت میں سبزہ زار تھانے میں مقدمہ درج کر لیا گیا۔
پولیس حکام کا کہنا ہے کہ واقعے کی مزید تفتیش جاری ہے اور ملزم کو قانون کے مطابق کارروائی کیلئے طلب کیا جائے گا۔ واقعے سے متعلق دستیاب شواہد، بشمول موقع پر چھوڑا گیا موبائل فون، بھی تحویل میں لے لیا گیا ہے۔
یہ بھی پڑھیں:ماڈل ہما سلیم کا مشہور کرکٹر پر ہراساں کرنے کا سنگین الزام
ٹریفک پولیس نے شہریوں کو ہدایت کی ہے کہ وہ ٹریفک قوانین کی پابندی کریں اور دورانِ کارروائی اہلکاروں کے ساتھ تعاون کریں، کیونکہ قوانین کی خلاف ورزی نہ صرف جرمانے بلکہ قانونی کارروائی کا سبب بھی بن سکتی ہے۔
