معروف کامیڈین اللہ رکھا پیپسی انتقال کر گئے
ذرائع کے مطابق اللہ رکھا پیپسی نجی ٹی وی کے ایک شو کی ریکارڈنگ میں مصروف تھے کہ اچانک طبیعت خراب ہونے پر زمین پر گر پڑے۔
انہیں انتہائی تشویش ناک حالت میں فوری طور پر قریبی ہسپتال منتقل کیا گیا، تاہم وہ جانبر نہ ہو سکے اور ڈاکٹروں نے معائنے کے بعد ان کی موت کی تصدیق کر دی۔
مرحوم اللہ رکھا پیپسی نے تھیٹر، فلموں اور متعدد نجی ٹی وی چینلز پر اپنی برجستہ کامیڈی اور منفرد اداکاری کے ذریعے انڈسٹری میں ایک الگ پہچان بنائی تھی ۔
انہوں نے متعدد اسٹیج ڈراموں میں اپنی فنکارانہ صلاحیتوں کا مظاہرہ کیا اور اپنے مخصوص مزاح سے شائقین کے دل جیتے۔
یہ بھی پڑھیں: معروف ٹک ٹاکر علی حیدر آبادی نے اہلیہ کو طلاق دے دی، ویڈیو وائرل
اسٹیج کے علاوہ انہوں نے مختلف مزاحیہ ٹی وی پروگرامز اور ڈراموں میں بھی پرفارم کیا جہاں ان کی حاضر جوابی اور قدرتی اداکاری کو خوب سراہا گیا۔
ان کے انتقال کی خبر پر شوبز حلقوں اور مداحوں میں گہرے رنج و غم کی لہر دوڑ گئی جبکہ فنکار برادری نے ان کی خدمات کو خراجِ تحسین پیش کرتے ہوئے اسے پاکستانی اسٹیج کے لیے بڑا نقصان قرار دیا۔
