معروف امریکی اداکار جیانکار لو ایسپوسیتو نے اسلام قبول کر لیا
عرب میڈیا رپورٹس کے مطابق شہرہ آفاق ٹی وی سیریز بریکنگ بیڈ میں گس فرنگ کے کردار سے شہرت حاصل کرنے والے جیانکارلو ایسپوسیتو نے سعودی عرب میں قیام کے دوران اسلام قبول کیا۔
سعودی عرب کی جنرل انٹرٹینمنٹ اتھارٹی کے چیئرمین ترکی آل الشیخ کی جانب سے بتایا گیا ہے کہ اداکار نے یہ فیصلہ مملکت میں اپنے قیام اور مقامی ماحول سے متاثر ہونے کے بعد کیا۔
جیانکارلو ایسپوسیتو کا شمار ہالی ووڈ کے ان فنکاروں میں ہوتا ہے جنہوں نے فلم اور ٹیلی ویژن دونوں شعبوں میں اپنی منفرد اداکاری سے نمایاں مقام حاصل کیا، وہ بریکنگ بیڈ کے علاوہ بیٹر کال سال، دی مینڈالوریئن اور دیگر کئی مشہور پروڈکشنز میں بھی جلوہ گر ہو چکے ہیں۔
رپورٹس کے مطابق اداکار سعودی عرب میں ایک پروڈکشن کے سلسلے میں موجود تھے، جہاں ان کے مقامی افراد اور مسلمان کمیونٹی کے ساتھ روابط بڑھے، ترکی آل الشیخ کے مطابق انہی مثبت تجربات نے جیانکارلو ایسپوسیتو کے فیصلے میں اہم کردار ادا کیا۔
سوشل میڈیا پر سامنے آنے والی ایک ویڈیو بھی گردش کر رہی ہے جس میں انہیں مسجد کے اندر پروڈکشن ٹیم کے ارکان کے ساتھ نماز ادا کرتے دیکھا جا سکتا ہے۔
یہ بھی پڑھیں: معروف فرانسیسی اداکار ڈیلن تھیری نے اسلام قبول کر لیا
ویڈیو کے بعد مداحوں کی جانب سے مختلف تبصرے کیے جا رہے ہیں اور کئی صارفین نے اداکار کے لیے نیک خواہشات کا اظہار کیا ہے۔
تاہم جیانکارلو ایسپوسیتو کی جانب سے اس حوالے سے تفصیلی ذاتی بیان سامنے نہیں آیا۔
