26 سالہ گلوکارہ کی اچانک موت نے موسیقی کے مداحوں اور فنکار برادری کو گہرے صدمے سے دوچار کر دیا ہے۔

افنانیا نوانگین کو شہرت اس وقت ملی جب انہوں نے معروف ٹی وی شو دی وائس نائیجیریا میں عالمی شہرت یافتہ گلوکارہ ریحانا کے گانے ٹیک اے بو کی شاندار پرفارمنس پیش کی، ان کی آواز اور انداز نے کم وقت میں لاکھوں دل جیت لیے تھے۔

امیموسو کوائر کے سربراہ سیم ایزوگوو کے مطابق یہ واقعہ ہفتے کے روز اس وقت پیش آیا جب افنانیا اپنے اپارٹمنٹ میں سو رہی تھیں۔ اسی دوران ایک کوبرا سانپ نے ان کی کلائی پر ڈس لیا۔ واقعے کے بعد سانپ پکڑنے والوں نے اپارٹمنٹ سے دو سانپ پکڑے، جن میں ایک درمیانے سائز کا کوبرا بھی شامل تھا۔

افنانیا کے قریبی دوست پاسکل نوورگو کے مطابق انہیں فوری طور پر قریبی کلینک لے جایا گیا، تاہم وہاں اینٹی وینم دستیاب نہ ہونے کے باعث انہیں فیڈرل میڈیکل سینٹر جابی منتقل کیا گیا۔ اسپتال پہنچنے تک ان کی حالت انتہائی نازک ہو چکی تھی، وہ سانس لینے میں دشواری کا شکار تھیں اور بات کرنے سے قاصر تھیں۔

یہ بھی پڑھیں:نیپال کے مشہور اداکار سنیل تھاپا انتقال کر گئے

ایزوگوو کا کہنا ہے کہ اسپتال میں ایک اینٹی وینم تو دیا گیا، مگر مطلوبہ مقدار دستیاب نہیں تھی۔ دوسری جانب اسپتال انتظامیہ نے ان الزامات کی تردید کرتے ہوئے دعویٰ کیا ہے کہ مریضہ کو بروقت اور مکمل طبی امداد فراہم کی گئی، تاہم شدید اعصابی پیچیدگیوں کے باعث ان کی جان نہ بچائی جا سکی۔

عالمی ادارہ صحت کے مطابق دنیا بھر میں ہر سال تقریباً 50 لاکھ افراد کو سانپ ڈستے ہیں، جن میں سے ایک لاکھ کے قریب اموات ہوتی ہیں۔