عالمی خبر رساں ادارے کی رپورٹ میں بتایا گیا کہ فائرنگ کا واقعہ لیبیا کے دارالحکومت تریپولی کے علاقے السراج میں پیش آیا جہاں نامعلوم موٹرسائیکل سواروں نے خنساء کی گاڑی پر اندھا دھند فائرنگ کردی۔
رپورٹ کے مطابق وی لاگر نے اپنی جان بچانے کے لیے گاڑی سے نکل کر بھاگنے کی کوشش بھی کی تاہم مسلح افراد نے تعاقب کر کے ان پر براہ راست فائرنگ کی اور متعدد گولیاں برساتے ہوئے انہیں ابدی نیند سلا دیا۔
خبر رساں ادارے کے مطابق حملہ آور معروف ولاگر کی ہلاکت کی تصدیق کے بعد جائے وقوعہ سے فرار ہو گئے تاہم تاحال ملزمان کا سراغ نہیں لگایا جا سکا۔
یہ بھی پڑھیں: سینئر اداکارہ شگفتہ اعجاز کے بھائی خالق حقیقی سے جا ملے
مقامی پولیس کے مطابق خنساء کی گاڑی کے شیشوں پر گولیوں کے نشانات موجود ہیں جبکہ وقوعہ سے گولیوں کے خول جمع کرکے فرانزک کے لیے بھیج دیئے گئے تاکہ واقعہ کی تفتیش کو آگے بڑھایا جا سکے۔
واضح رہے کہ وی لاگر خنساء مجاہد فیشن اور بیوٹی پارلر کے کاروبار سے منسلک تھیں اور لیبیا کی خواتین میں ان کی خاصی مقبول تھی، ان کے اپنے بیوٹی سیلون اور خواتین کے ملبوسات کے آؤٹ لیٹس بھی تھے جبکہ وہ لیبیا کی سیاسی جماعت زاویہ کے رہنما معاذ المنفوخ کی اہلیہ بھی تھیں۔
پولیس کا کہنا ہے کہ وی لاگر کے قتل کی تفتیش میں سیاسی قتل کا پہلو بھی زیر غور ہے۔
