دوسری شادی کی تصدیق سے متعلق دانیہ شاہ کا ویڈیو بیان کچھ روز قبل منظر عام پر آیا تھا، جس میں دانیہ نے بتایا تھا کہ میں نے چند ماہ پہلے حکیم شہزاد سے دوسری شادی کرلی ہے۔

دانیہ شاہ نے انٹرویو میں بتایا کہ ابھی انکا حکیم شہزاد سے صرف نکاح ہوا ہے، رخصتی اور ولیمہ بعد میں ہوگا، یہ نکاح 2 سے 3 ماہ قبل ہوا تھا، انہوں نے مزید بتایا کہ یہ فیصلہ بہت سوچ سمجھ کر کیا ہے کیوں کہ مجھے محرم کی ضرورت تھی، دانیہ شاہ کا کہنا تھا کہ چاہتی ہوں ہر بیوہ کو حکیم شہزاد جیسا ہمسفر ملے۔

حکیم شہزاد نے دانیہ سے شادی کے سوال پر بتایا کہ جب میں دانیہ کا کیس لڑنے کیلئے وکیل بنا تو ہماری ایک ویڈیو وائرل ہوئی جس پر ہمیں بہت زیادہ تنقید کا نشانہ بنایا گیا، نامناسب کمنٹس کیے، انہوں نے کہا کہ دانیہ کو عامر لیاقت کی قاتلہ اور بدکردار عورت تک کہا گیا جو مجھے کافی ناگوارگزرا اور سچ اس کے برعکس تھا۔

حکیم شہزاد بولے کہ دانیہ جیسی نیک اور شریف عورت اپنی پوری زندگی میں نہیں دیکھی، ہمارے معاشرے میں دوسری شادی کو جرم سمجھا جاتا ہے، میں نے یہ جرم بار بار کیا، دانیہ شاہ سے میری اب چوتھی شادی ہوئی ہے، میرے اوپر اللہ کی بہت زیادہ رحمت ہے۔

میزبان نے حکیم شہزاد سے سوال کیا کہ اب کہا جارہا ہے عامر لیاقت کے بعد آپ کی باری ہے جس پر دانیہ کے شوہر حکیم شہزاد نے کہا یہ سب فضول باتیں ہیں، دانیہ نے ان کی ویڈیوز لیک کیں تو انہوں نے خودکشی کی، یہ جھوٹ ہے اس بندے نے کوئی خودکشی نہیں کی، اس کا قتل ہوا ہے۔

حکیم شہزاد نے مزید کہا قتل کے بعد بہت کوشش کی کہ ان کا پوسٹ مارٹم ہو لیکن انکے دوسرے گھر والوں نے نہیں کروانے دیا، آخر کیوں پوسٹ مارٹم نہیں ہوا پتا چلنا چاہیے تھا کہ عامر لیاقت کی موت کیسے ہوئی، دن دہاڑے ایم این اے کا قتل ہوتا ہے اور بہانہ بنایا جاتا ہے کہ کمرے میں دھواں بھرنے سے موت ہوئی یا دانیہ کی جاری کردہ ویڈیوز کی وجہ سے موت ہوگئی۔

حکیم شہزاد نے کہا عامر لیاقت ایسا تگڑا اور مضبوط انسان تھا کہ اس کی کروڑوں ویڈیوز بھی لیک ہوجاتیں تب بھی وہ خودکشی نہ کرتا، دانیہ پر جھوٹے اور بے بنیاد الزامات عائد کیے گئے۔

حکیم شہزاد کا کہنا تھا کہ میں کچھ مہینوں سے اس کی زندگی میں آیا ہوں، ان کے ساتھ کوئی مرد نہیں تھا، بھائی چھوٹا ہے، مجھے یہ اچھی لگیں اور محبت ہوگئی، جب میری دانیہ کی والدہ سے پہلی ملاقات ہوئی اور انہوں نے مدد طلب کی تو میں نے شرط رکھی کہ میں دانیہ سے شادی کروں گا کیونکہ اگر ایسے ہی اس کا کیس لڑتا تو لوگ بدکردار کہتے اور الزامات عائد کرتے۔