کیا عائزہ خان ڈرامہ انڈسٹری چھوڑنے لگی ہیں؟
May, 22 2024
کراچی :(ویب ڈیسک )پاکستان شوبز کی مقبول اداکارہ عائزہ خان کا اس وقت ٹی وی پر ڈرامہ جان جہاں آن ائیر ہے جس میں ان کے ہمراہ حمزہ علی عباسی ہے،تاہم اس ڈرامے کے چلتے ان سے متعلق یہ خبریں گردش کررہی ہیں کہ وہ ڈرامہ انڈسٹری کو خیر باد کہنے والی ہیں۔
تفصیلات کے مطابق مقبو ل اداکارہ کےمشہور ڈرامہ سیریل ’جان جہاں‘ کی آخری قسط نشر ہونے والی ہے۔اس ڈرامے میں ان کے ہمراہ حمزہ علی عباسی ہیں،دونوں اس سے قبل سپر ہٹ ڈرامے پیارے افضل میں آئے تھے اور انکی جوڑی کو خوب سراہا گیا تھا۔
ڈرامہ انڈسٹری کی نامور اداکارہ عائزہ خان نے گذشتہ سال نومبر 2023 میں انسٹاگرام پر ایک پیغام میں کہا تھا کہ ’جان جہاں‘ ان کا آخری پراجیکٹ ہے،اس پیغام میں انہوں نے انڈسٹری سے ممکنہ علیحدگی کی طرف اشارہ کیا تھا۔
ڈرامہ انڈسٹری کی مقبول ترین اداکارہ کے حوالے سے آنے والی خبروں نے انکے مداحوں کو شش و پنج میں مبتلا کردیا ہے ،مداحوں کے لیے یہ بات ہضم کرنا ناممکن ہے کہ ان کی پسندیددہ اداکارہ کا یہ آخری پراجیکٹ ہے جس کے بعد مبینہ طور پر وہ سکرین پر جلوہ گر نہ ہوں۔
سال 2013 کے بلاک بسٹر ڈرامہ ’پیارے افضل‘ میں عائزہ خان اور حمزہ علی عباسی بطور جوڑی کاسٹ کیے گئے تھے اور اب 10 سال بعد دونوں ایک ساتھ بطور جوڑی ’جانِ جہاں‘ میں نظر آرہے ہیں۔
حمزہ علی عباسی نے کچھ عرصہ قبل شوبز انڈسٹری چھوڑنے کا اعلان کرتے ہوئے کہا تھا کہ وہ اپنا وقت دین کی خدمات کے لیے صرف کریں گے تاہم پھر انہوں نے اس حوالے سے یو ٹرن لیا اور انہوںنے دوبارہ سے انڈسٹری میں واپس آنے کا عندیہ دیا،
انہوں نے کچھ اشتہارات میں بھی کام کیا اور پھر اب وہ تقریبا دس سال بعد چھوٹی اسکرین پر جلوہ گر ہوئے اور جان جہاں میں کام کیا جس میں ان کے ساتھ عائزہ خان تھیں۔
عائزہ اور حمزہ علی عباسی کی جوڑی کو پیارے افضل میں بہت زیادہ پسند کیا گیا تھا،یہ کہنا بے جا نہ ہوگا کہ دونوں اداکاروں کو اس ڈرامے نے شہرت کی بلندیو ں پر پہنچایا۔
عائزہ خان اس ڈرامے کے بعد نہ صرف پاکستان بلکہ دنیا بھر میں اردو بولنے اور سمجھنے والوں کی پسندیدہ اداکار بن گئیں جب کہ حمزہ علی عباسی نے بھی اپنی منفرد فین فالوونگ بنائی۔
