ملک بھر میں ایل پی جی ایسوسی ایشن کا ہڑتال کا اعلان
تفصیلات کے مطابق ایل پی جی مارکیٹس ایسوسی ایشنز نے حکومت کی جانب سے قیمتوں کے تعین کے نئے طریقہ کار کو مسترد کرتے ہوئے احتجاج کا فیصلہ کیا ہے۔ اس حوالے سے ایل پی جی مارکیٹس ایسوسی ایشن کے سینئر وائس چیئرمین علی حیدر نے ہڑتال کے فیصلے کی تصدیق کی ہے۔
علی حیدر کا کہنا ہے کہ تمام متعلقہ ایسوسی ایشنز کے ہنگامی اجلاس میں حکومتی نئے پرائسنگ فارمولے کے خلاف متفقہ فیصلہ کیا گیا، 16 نومبر سے ملک بھر میں ایل پی جی کی فروخت بند کردی جائے گی، جس کے باعث صارفین کو گیس کے حصول میں مشکلات کا سامنا کرنا پڑ سکتا ہے۔
ایسوسی ایشنز کے نمائندوں نے مؤقف اختیار کیا ہے کہ حکومت کا نیا قیمتوں کا فارمولا قابل قبول نہیں، کیونکہ اس کے نفاذ سے ایل پی جی کی قیمتوں میں 25 سے 30 فیصد تک اضافہ ہونے کا امکان ہے۔
دوسری جانب ہڑتال کے اعلان کے بعد گھریلو اور تجارتی صارفین میں تشویش پیدا ہوگئی ہے، کیونکہ کئی علاقوں میں شہری پہلے ہی سوئی گیس کی عدم دستیابی کے باعث ایل پی جی استعمال کرنے پر مجبور ہیں۔
ایسوسی ایشنز نے حکومت سے مطالبہ کیا ہے کہ قیمتوں کے نئے فارمولے پر نظرثانی کی جائے تاکہ کاروبار اور صارفین دونوں کو ممکنہ مشکلات سے بچایا جاسکے۔
