ایل پی جی کی قیمتیں بے قابو ہوگئیں
تفصیلات کے مطابق لاہور میں ایل پی جی کی قیمتوں میں ایک مرتبہ پھر ہوشربا اضافہ ہوگیا ہے، جس کے باعث گھریلو صارفین شدید پریشانی کا شکار ہیں۔
آئل اینڈ گیس ریگولیٹری اتھارٹی (اوگرا) کی جانب سے ایل پی جی کی سرکاری قیمت 279 روپے 34 پیسے فی کلو مقرر کی گئی ہے، تاہم مارکیٹ میں اس نرخ پر گیس دستیاب نہیں۔
شہر کے مختلف علاقوں میں دکاندار سرکاری نرخنامے کے برعکس ایل پی جی 530 سے 600 روپے فی کلو تک فروخت کر رہے ہیں، اس طرح صارفین کو سرکاری قیمت سے دگنی سے بھی زیادہ رقم ادا کرنا پڑ رہی ہے۔
دوسری جانب ایل پی جی فروخت کرنے والے دکانداروں نے قیمتوں میں اضافے کا ذمہ دار پلانٹ مالکان کو قرار دیا ہے۔ ان کا کہنا ہے کہ جب تک ایل پی جی پلانٹس پر سرکاری نرخوں کا اطلاق نہیں ہوگا، اس وقت تک مارکیٹ میں مقررہ قیمت پر گیس کی فروخت ممکن نہیں۔
شہریوں کا کہنا ہے کہ گھروں میں سوئی گیس کی عدم دستیابی کے باعث انہیں کھانا پکانے کے لیے مہنگی ایل پی جی خریدنا پڑ رہی ہے، جس سے گھریلو بجٹ مزید متاثر ہو رہا ہے۔
شہریوں نے حکومت اور متعلقہ اداروں سے مطالبہ کیا ہے کہ ایل پی جی کی قیمتوں پر قابو پایا جائے اور سرکاری نرخنامے پر سختی سے عمل درآمد یقینی بنایا جائے تاکہ عوام کو اضافی مالی بوجھ سے نجات مل سکے۔
