عالمی منڈی میں خام تیل کی قیمتیں بڑھ گئیں
غیر ملکی خبر رساں ادارے کے مطابق 28 اکتوبر 2026 کو گرینچ معیاری وقت کے مطابق صبح ایک بج کر 40 منٹ پر برینٹ خام تیل کے مستقبل کے سودوں کی قیمت میں ایک ڈالر 48 سینٹ، یعنی 1.3 فیصد اضافہ ہوا، جس کے بعد قیمت 115.36 ڈالر فی بیرل تک پہنچ گئی۔
اسی طرح امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل کی قیمت بھی ایک ڈالر 22 سینٹ، یعنی 1.22 فیصد بڑھ کر 101.12 ڈالر فی بیرل ہوگئی۔
رپورٹس کے مطابق ایران کے حامی یمن کے حوثیوں نے منگل کو دعویٰ کیا تھا کہ انہوں نے سعودی عرب کی سب سے بڑی آئل ریفائنری کو میزائل سے نشانہ بنایا ہے، تاہم سعودی حکام کی جانب سے فوری طور پر حملے کی تصدیق نہیں کی گئی۔
مذکورہ آئل ریفائنری میں روزانہ 5 لاکھ 50 ہزار بیرل تیل صاف کرنے کی صلاحیت ہے، خطے میں جاری تنازع اور توانائی کی تنصیبات کو لاحق خطرات کے باعث عالمی منڈی میں تیل کی سپلائی کے حوالے سے تشویش پائی جاتی ہے۔
اس سے ایک روز قبل مشرقِ وسطیٰ میں مذاکرات کے باعث تیل کی فراہمی سے متعلق خدشات میں کمی آئی تھی، جس کے نتیجے میں عالمی منڈی میں خام تیل کی قیمتیں تقریباً دو ڈالر فی بیرل کم ہوگئی تھیں۔ تاہم ریفائنری پر حملے کے دعوے کے بعد قیمتوں میں دوبارہ تیزی آگئی۔
دوسری جانب امریکا میں خام تیل کے ذخائر میں معمولی اضافے کا امکان ظاہر کیا گیا ہے۔ رائٹرز کے آٹھ تجزیہ کاروں کے سروے کے مطابق 23 اکتوبر کو ختم ہونے والے ہفتے کے دوران امریکی خام تیل کے ذخائر میں تقریباً 15 ہزار بیرل اضافے کی توقع تھی۔
ماہرین کے مطابق مشرقِ وسطیٰ کی صورتِ حال اور تیل کی عالمی سپلائی سے متعلق خدشات آئندہ دنوں میں قیمتوں کے اتار چڑھاؤ پر اثر انداز ہوسکتے ہیں۔
