پانی کے بل جمع نہ کروانے والوں کیلئے آخری وارننگ جاری
واٹر اینڈ سینی ٹیشن ایجنسی (واسا) راولپنڈی نے واجبات کی وصولی کیلئے کارروائیاں تیز کر دی ہیں اور نادہندگان کے خلاف ریونیو ریکوری مہم کے تحت آپریشن شروع کر دیا ہے۔
اس سلسلے میں راولپنڈی کے علاقے سیٹلائٹ ٹاؤن کے ای بلاک میں کارروائی کی گئی، جہاں طویل عرصے سے پانی کے بل ادا نہ کرنے والے صارفین کو واجبات جمع کروانے کیلئے آخری مہلت دی گئی۔
واضح رہے کہ یہ آپریشن واسا راولپنڈی کے منیجنگ ڈائریکٹر عزیز اللہ خان کی خصوصی ہدایات پر کیا گیا، کارروائی کی نگرانی سینئر اسپیشل مجسٹریٹ عامر اشفاق قریشی، ڈائریکٹر فنانس اینڈ ریونیو طاہر بشیر مرزا اور ڈپٹی ڈائریکٹر ریونیو اکمل یاسین نے کی۔
آپریشن میں واسا کے متعلقہ حکام، فیلڈ عملے اور پنجاب پولیس کے اہلکاروں نے بھی حصہ لیا۔
اس موقع پر سینئر اسپیشل مجسٹریٹ عامر اشفاق قریشی نے کہا کہ نادہندگان کو واجبات کی ادائیگی کا آخری موقع فراہم کیا جا رہا ہے۔ جو صارفین مقررہ مدت کے اندر اپنے ذمہ واجب الادا رقم جمع نہیں کروائیں گے، ان کے پانی کے کنکشن منقطع کر دیے جائیں گے۔
انہوں نے مزید خبردار کیا کہ عدم ادائیگی کی صورت میں متعلقہ صارفین کے خلاف قانون کے مطابق مزید کارروائی بھی عمل میں لائی جا سکتی ہے۔
حکام کے مطابق ریونیو ریکوری مہم کا بنیادی مقصد واجبات کی بروقت وصولی یقینی بنانا اور ادارے کے مالی وسائل کو مستحکم کرنا ہے۔
یہ بھی پڑھیں:مولانا فضل الرحمان کا وزیراعظم کو کے پی میں گورنرراج سے گریز کا مشورہ
واسا انتظامیہ نے تمام گھریلو اور کمرشل صارفین پر زور دیا ہے کہ وہ کنکشن منقطع ہونے اور قانونی کارروائی سے بچنے کیلئے اپنے بقایا جات فوری ادا کریں۔
