آٹے کی قیمتوں میں ایک پھر بڑا اضافہ
مارکیٹ ذرائع کے مطابق کوئٹہ میں آٹے کی قیمتوں میں مسلسل اضافے کا سلسلہ جاری ہے، حالیہ اضافے کے بعد 20 کلو آٹے کے تھیلے کی قیمت میں مزید 70 روپے کا اضافہ ریکارڈ کیا گیا، جس سے اس کی قیمت 2 ہزار 850 روپے سے بڑھ کر 2 ہزار 920 روپے ہوگئی۔
اس اضافے کے بعد شہریوں کا کہنا ہے کہ آٹے کی قیمت میں مسلسل اضافے نے مشکلات مزید بڑھا دی ہیں، روزمرہ استعمال کی بنیادی اشیاء میں شامل آٹے کے مہنگا ہونے سے گھریلو بجٹ متاثر ہونے لگا ہے، حکومت سے فوری اقدامات کا مطالبہ کرتے ہیں۔
دوسری جانب فلور ملز مالکان کا کہنا ہے کہ انہیں مارکیٹ میں گندم کی دستیابی میں مشکلات کا سامنا ہے، گندم کی قلت اور قیمتوں میں اضافے کے باعث آٹے کی پیداواری لاگت بھی بڑھ رہی ہے، جس کے اثرات آٹے کی قیمتوں پر پڑ رہے ہیں۔
فلور ملز مالکان نے خدشہ ظاہر کیا ہے کہ اگر گندم کی دستیابی کے مسائل اور قیمتوں میں اضافہ جاری رہا تو آٹے کے نرخ مزید بڑھ سکتے ہیں۔
یہ بھی پڑھیں:سونے کی قیمت میں بڑی کمی، فی تولہ کتنے کا ہوگیا؟
صارفین نے آٹے کی بڑھتی ہوئی قیمتوں پر تشویش کا اظہار کرتے ہوئے حکومت اور متعلقہ حکام سے مطالبہ کیا ہے کہ قیمتوں میں اضافے کا فوری نوٹس لیا جائے اور عوام کو ریلیف فراہم کرنے کیلئے مؤثر اقدامات کیے جائیں۔
