سونے کی قیمت میں ایک بار پھر کمی
تفصیلات کے مطابق بین الاقوامی مارکیٹ میں سونے کی قیمت میں 5 ڈالر کی کمی ہوئی، جس کے بعد فی اونس سونا 4 ہزار 375 ڈالر کا ہوگیا۔ عالمی مارکیٹ میں قیمتوں میں کمی کے اثرات مقامی صرافہ بازاروں پر بھی نظر آئے۔
مقامی صرافہ مارکیٹ میں فی تولہ سونے کی قیمت 500 روپے کم ہوگئی، جس کے بعد نئی قیمت 4 لاکھ 59 ہزار 936 روپے مقرر کی گئی ہے۔
اسی طرح 10 گرام سونے کی قیمت میں بھی 429 روپے کی کمی ریکارڈ کی گئی، جس کے بعد 10 گرام سونا 3 لاکھ 94 ہزار 320 روپے کا ہوگیا۔
دوسری جانب سونے کے برعکس چاندی کی قیمت میں اضافہ دیکھنے میں آیا، مقامی مارکیٹ میں فی تولہ چاندی کی قیمت 13 روپے بڑھ کر 6 ہزار 949 روپے ہوگئی۔
صرافہ مارکیٹ میں گزشتہ روز بھی سونے کی قیمت میں نمایاں کمی ریکارڈ کی گئی تھی، جمعرات کو فی تولہ سونا 3 ہزار 500 روپے جبکہ چاندی کی قیمت 175 روپے فی تولہ کم ہوئی تھی۔
مارکیٹ ماہرین کے مطابق عالمی سطح پر سونے کی قیمت میں ہونے والی تبدیلیوں کا براہِ راست اثر مقامی مارکیٹ پر پڑتا ہے، جبکہ عالمی معاشی حالات اور سرمایہ کاروں کے رجحانات بھی قیمتی دھاتوں کی قیمتوں میں اتار چڑھاؤ کی اہم وجوہات میں شامل ہیں۔
یہ بھی پڑھیں:عالمی منڈی میں خام تیل مہنگا، خطرے کی گھنٹی بج گئی
مسلسل دوسرے روز سونے کی قیمت میں کمی کے بعد مقامی مارکیٹ میں زیورات اور سونے میں سرمایہ کاری کرنے والے افراد کی توجہ عالمی اور ملکی مارکیٹ کے آئندہ رجحان پر مرکوز ہوگئی ہے۔
