ایل پی جی کی قیمت 400 روپے سے تجاوز کر گئی
شہر کی مختلف پرچون مارکیٹوں میں ایل پی جی کی قیمت 400 روپے فی کلو سے بھی تجاوز کر گئی، جس کے باعث گھریلو صارفین شدید مشکلات کا شکار ہو گئے ہیں۔
انتظامیہ کی جانب سے ایل پی جی کا سرکاری ریٹ 241 روپے فی کلوگرام مقرر کیا گیا ہے، تاہم مارکیٹ میں اس کے برعکس ایل پی جی 400 سے 430 روپے فی کلوگرام تک فروخت ہونے کی اطلاعات ہیں۔ سرکاری نرخ اور مارکیٹ قیمت میں بڑے فرق پر شہریوں نے تشویش کا اظہار کیا ہے۔
شہریوں کا کہنا ہے کہ روزمرہ استعمال کی اشیاء کی بڑھتی ہوئی قیمتوں کے باعث پہلے ہی گھریلو بجٹ متاثر ہے، جبکہ ایل پی جی کی قیمتوں میں مسلسل اضافے نے مشکلات میں مزید اضافہ کر دیا ہے، سفید پوش طبقہ سب سے زیادہ متاثر ہو رہا ہے اور کئی خاندانوں کیلئے گیس کا حصول مشکل ہوتا جا رہا ہے۔
صارفین نے مطالبہ کیا ہے کہ حکومت ایل پی جی کی قیمتوں پر مؤثر نگرانی کرے اور اسے مقررہ سرکاری نرخوں پر دستیاب بنانے کیلئے فوری اقدامات کرے، اگر قیمتوں کو کنٹرول نہ کیا گیا تو عام افراد کے مسائل میں مزید اضافہ ہو سکتا ہے۔
یہ بھی پڑھیں:مرغی کا گوشت پھر مہنگا، فی کلو کتنے کا ہوگیا؟
دوسری جانب ماہرین کا کہنا ہے کہ ایل پی جی کی قیمتوں میں اضافے کا اثر نہ صرف گھریلو صارفین بلکہ چھوٹے کاروبار، ہوٹلوں اور دیگر شعبوں پر بھی پڑتا ہے۔
انہوں نے زور دیا ہے کہ قیمتوں کے تعین اور فراہمی کے نظام کو بہتر بنانے کی ضرورت ہے تاکہ عوام کو ریلیف مل سکے۔
