انگلینڈ کے فاسٹ بولر جان ٹرنر کا 25 سال کی عمر میں ریٹائرمنٹ کا اعلان

جان ٹرنر نے 2024 میں انگلینڈ کی نمائندگی کرتے ہوئے دو ایک روزہ اور دو ٹی ٹونٹی انٹرنیشنل میچز کھیلے تھے تاہم گزشتہ سال جون میں کمر میں اسٹریس فریکچر کے باعث وہ کسی بھی پیشہ ورانہ مقابلے میں حصہ نہ لے سکے۔

معاشیات میں گریجویٹ جان ٹرنر کا ہیمپشائر کاؤنٹی کے ساتھ معاہدہ مزید دو سال کے لیے باقی تھا جبکہ گزشتہ برس کے اختتام تک وہ انگلینڈ اینڈ ویلز کرکٹ بورڈ کی ڈیویلپمنٹ کنٹریکٹ کا بھی حصہ تھے، اس کے باوجود انہوں نے کرکٹ کو خیر باد کہنے کا فیصلہ کیا۔

اپنے بیان میں جان ٹرنر نے کہا کہ مسلسل انجریز، خاص طور پر ایک سال سے زائد عرصے تک میدان سے دور رکھنے والے اسٹریس فریکچر نے انہیں مستقبل پر سنجیدگی سے غور کرنے پر مجبور کیا، ان کے بقول اب زندگی کی نئے مرحلے کا اغاز کرنے کا یہی مناسب وقت ہے۔

یہ بھی پڑھیں: فٹبال میچ کے دوران آسمانی بجلی گرنے سے کھلاڑی جانبحق

انہوں نے کہا کہ انگلینڈ اور ہیمپشائر کی نمائندگی کرنا ان کے بچپن کا خواب تھا۔ جو پورا ہوا، لیکن کرکٹ سے ریٹائرمنٹ کا فیصلہ ان کی زندگی کے مشکل ترین فیصلوں میں شامل ہے۔

جان ٹرنر نے 2021 میں ہیمپشائر کی جانب سے فرسٹ کلاس کرکٹ میں ڈیبیو کیا تھا، انہوں نے اپنے پانچ سالہ سفر کو یادگار قرار دیتے ہوئے کلب انتظامیہ، کوچز، ساتھی کھلاڑیوں اور مداحوں کی حمایت پر شکریہ بھی ادا کیا۔