عالمی منڈی میں تیل کی قیمتیں گر گئیں
عالمی سرمایہ کاروں کی جانب سے کشیدگی میں ممکنہ کمی کی توقع کے باعث تیل کی مارکیٹ میں فروخت کا رجحان بڑھ گیا، جس کے نتیجے میں قیمتیں ایک ہی روز میں چار ڈالر سے زائد فی بیرل گر گئیں۔
غیر ملکی میڈیا رپورٹس کے مطابق عالمی معیار سمجھے جانے والے برینٹ خام تیل کی قیمت میں 4.08 ڈالر فی بیرل کمی ریکارڈ کی گئی، جس کے بعد یہ 83.85 ڈالر فی بیرل پر آ گیا۔
اسی طرح امریکی معیار کے ویسٹ ٹیکساس انٹرمیڈیٹ خام تیل کی قیمت بھی 4.01 ڈالر کم ہو کر 80.66 ڈالر فی بیرل پر ٹریڈ ہوتی رہی۔
معاشی ماہرین کے مطابق مشرق وسطیٰ میں کشیدگی کے خدشات عالمی تیل کی قیمتوں پر براہِ راست اثر انداز ہوتے ہیں۔ ایران سے متعلق امریکی مؤقف میں نرمی اور ممکنہ سفارتی پیش رفت کی امید نے سرمایہ کاروں کے خدشات کو وقتی طور پر کم کیا، جس کے باعث مارکیٹ میں قیمتوں میں نمایاں کمی آئی۔
تجزیہ کاروں کا کہنا ہے کہ اگر امریکا اور ایران کے درمیان سفارتی مذاکرات کامیاب رہتے ہیں اور خطے میں کشیدگی مزید کم ہوتی ہے تو عالمی منڈی میں تیل کی قیمتیں مزید مستحکم ہو سکتی ہیں۔ تاہم اگر صورتحال دوبارہ خراب ہوئی تو خام تیل کی قیمتوں میں ایک بار پھر اضافہ دیکھنے میں آ سکتا ہے۔
یہ بھی پڑھیں:عوام سے ایک ماہ میں کتنا ٹیکس وصول کیا گیا؟
عالمی توانائی مارکیٹ کے ماہرین آئندہ چند روز میں امریکا، ایران اور مشرق وسطیٰ کی سیاسی صورتحال پر گہری نظر رکھے ہوئے ہیں، کیونکہ ان پیش رفتوں کا عالمی توانائی منڈی اور ایندھن کی قیمتوں پر براہِ راست اثر پڑ سکتا ہے۔
