عالمی منڈی میں خام تیل سستا ہوگیا
غیر ملکی خبر ایجنسی کے مطابق عالمی معیار سمجھے جانے والے برینٹ خام تیل کی قیمت میں 1.29 ڈالر فی بیرل کی کمی ہوئی، جس کے بعد یہ 89.45 ڈالر فی بیرل پر آ گئی۔
اسی طرح امریکی ویسٹ ٹیکساس انٹرمیڈیٹ خام تیل کی قیمت بھی 56 سینٹ یا 0.66 فیصد کمی کے بعد 83.90 ڈالر فی بیرل پر ٹریڈ کرتی رہی۔
رپورٹ کے مطابق اگرچہ امریکا اور ایران کے درمیان کشیدگی میں اضافہ ہوا ہے، تاہم مشرقِ وسطیٰ میں تیل بردار بحری جہازوں کی معمول کے مطابق آمدورفت جاری رہنے سے عالمی منڈی کو یہ تاثر ملا کہ تیل کی سپلائی فوری طور پر متاثر نہیں ہوگی، جس کے نتیجے میں قیمتوں پر دباؤ آیا اور خام تیل سستا ہو گیا۔
معاشی ماہرین کا کہنا ہے کہ عالمی تیل کی قیمتوں میں اتار چڑھاؤ کا انحصار صرف جغرافیائی سیاسی کشیدگی پر نہیں بلکہ سپلائی چین، بحری نقل و حمل، طلب اور سرمایہ کاروں کے اعتماد پر بھی ہوتا ہے، اگر خطے میں صورتحال مزید بگڑتی ہے یا تیل کی ترسیل میں رکاوٹ پیدا ہوتی ہے تو قیمتوں میں دوبارہ اضافہ دیکھنے میں آ سکتا ہے۔
واضح رہے کہ گزشتہ کاروباری سیشن میں جنگی خدشات کے باعث خام تیل کی قیمتوں میں نمایاں اضافہ ریکارڈ کیا گیا تھا، جہاں برینٹ خام تیل 7.91 فیصد جبکہ ویسٹ ٹیکساس انٹرمیڈیٹ 6.56 فیصد اضافے کے ساتھ بند ہوا تھا۔
یہ بھی پڑھیں:بجلی کی قیمتوں میں ایک بار پھر اضافے کا امکان
اس سے قبل جنگ میں مختصر وقفے کے بعد دونوں عالمی معیار کے خام تیل کی قیمتوں میں تقریباً 5 فیصد کمی بھی دیکھی گئی تھی، جس سے مارکیٹ میں غیر یقینی صورتحال برقرار ہے۔
