خام تیل کی قیمتوں میں مزید اضافہ
عالمی منڈی میں خام تیل کی قیمتوں میں تقریباً 3 فیصد تک اضافہ ہوا، جس کے بعد برینٹ خام تیل کی قیمت 90 ڈالر فی بیرل کی سطح عبور کر گئی۔
مارکیٹ رپورٹس کے مطابق برینٹ خام تیل کے فیوچر میں 2.77 ڈالر یا 3.14 فیصد اضافہ ہوا، جس کے بعد قیمت 90.87 ڈالر فی بیرل تک پہنچ گئی، یہ قیمت 11 جون کے بعد بلند ترین سطح قرار دی جا رہی ہے۔
رپورٹس کے مطابق گزشتہ ہفتے برینٹ خام تیل کی قیمت میں مجموعی طور پر 15.9 فیصد اضافہ ریکارڈ کیا گیا، جو اپریل کے بعد سب سے بڑا ہفتہ وار اضافہ ہے۔
معاشی ماہرین کا کہنا ہے کہ مشرق وسطیٰ میں کشیدگی بڑھنے سے عالمی سطح پر تیل کی فراہمی کے حوالے سے خدشات پیدا ہوئے ہیں، جس کے باعث قیمتوں میں اضافہ دیکھا جا رہا ہے۔
یہ بھی پڑھیں:روٹی 25 اور نان 35 روپے کا ہوگیا، شہری پریشان
دوسری جانب امریکی خام تیل ویسٹ ٹیکساس انٹرمیڈیٹ (WTI) کی قیمت میں بھی اضافہ ہوا، ڈبلیو ٹی آئی خام تیل 2.35 ڈالر یا 2.85 فیصد اضافے کے بعد 84.84 ڈالر فی بیرل پر ٹریڈ کرتا رہا، جو 12 جون کے بعد بلند ترین سطح ہے۔ گزشتہ ہفتے ڈبلیو ٹی آئی کی قیمت میں 15.5 فیصد اضافہ ہوا، جو مارچ کے آغاز کے بعد سب سے بڑی ہفتہ وار بڑھوتری ہے۔
