روٹی 25 اور نان 35 روپے کا ہوگیا، شہری پریشان
نان بائیوں کے مطابق روٹی کی قیمت میں 9 روپے جبکہ نان کی قیمت میں 10 روپے کا اضافہ کیا گیا ہے، جس کے بعد روٹی کی نئی قیمت 25 روپے اور نان کی قیمت 35 روپے مقرر کر دی گئی ہے۔
نان بائیوں کا کہنا ہے کہ آٹے کی بڑھتی ہوئی قیمتوں کے باعث پرانے نرخوں پر روٹی اور نان کی فروخت ممکن نہیں رہی، 20 کلو آٹے کے تھیلے کی قیمت 2400 روپے تک پہنچ چکی ہے، جس سے کاروباری اخراجات میں نمایاں اضافہ ہوا ہے اور قیمتیں بڑھانے کے سوا کوئی راستہ نہیں بچا۔
نان بائیوں نے خبردار کیا ہے کہ اگر حکومت کی جانب سے نئی قیمتوں کو تسلیم نہ کیا گیا تو وہ تندور بند کرنے پر مجبور ہو جائیں گے۔
دوسری جانب شہریوں نے روٹی اور نان کی قیمتوں میں اضافے پر تشویش کا اظہار کرتے ہوئے کہا ہے کہ مسلسل بڑھتی مہنگائی نے عام آدمی کی زندگی مشکل بنا دی ہے، آمدن میں اضافہ نہیں ہو رہا جبکہ روزمرہ استعمال کی بنیادی اشیا کی قیمتیں مسلسل بڑھ رہی ہیں۔
یہ بھی پڑھیں:امریکا ایران کشیدگی: تیل کی قیمت بلند ترین سطح پر پہنچ گئی
سفید پوش طبقے کے افراد کا کہنا ہے کہ گھریلو بجٹ پہلے ہی مشکلات کا شکار ہے اور اب روٹی جیسی بنیادی ضرورت مہنگی ہونے سے مسائل میں مزید اضافہ ہوگا۔
شہریوں نے حکومت سے مطالبہ کیا ہے کہ آٹے کی قیمتوں میں کمی کیلئے فوری اقدامات کیے جائیں تاکہ عوام کو ریلیف مل سکے اور روٹی و نان کی قیمتیں دوبارہ کم ہو سکیں۔
