سونے اور چاندی کی قیمتیں گر گئیں
عالمی منڈی میں سونے کی قیمت میں کمی کے اثرات براہِ راست پاکستان کی مقامی صرافہ مارکیٹ پر بھی دیکھنے میں آئے، جہاں سونے اور چاندی دونوں کے نرخ کم ہوگئے۔
آل پاکستان صرافہ جیمز اینڈ جیولرز ایسوسی ایشن کے جاری کردہ اعداد و شمار کے مطابق 24 قیراط فی تولہ سونے کی قیمت میں ایک ہزار روپے کی کمی ہوئی، جس کے بعد نئی قیمت 4 لاکھ 31 ہزار 236 روپے مقرر ہوگئی۔
اسی طرح 24 قیراط 10 گرام سونا 730 روپے سستا ہوکر 3 لاکھ 69 ہزار 715 روپے کی سطح پر پہنچ گیا۔
دوسری جانب چاندی کی قیمت میں بھی نمایاں کمی دیکھنے میں آئی، ایسوسی ایشن کے مطابق 24 قیراط فی تولہ چاندی کا بھاؤ 271 روپے کم ہونے کے بعد 6 ہزار 393 روپے ہوگیا، جس سے چاندی کے زیورات اور دیگر مصنوعات خریدنے والوں کو بھی ریلیف ملے گا۔
بین الاقوامی مارکیٹ میں بھی سونے کی قیمت میں کمی کا رجحان برقرار رہا، عالمی مارکیٹ میں فی اونس سونا 10 ڈالر سستا ہونے کے بعد 4 ہزار 88 ڈالر کی سطح پر آگیا، جس کے باعث مقامی مارکیٹ میں بھی قیمتوں پر دباؤ دیکھا گیا۔
یہ بھی پڑھیں:راتوں رات ٹرپل منافع، ایرانی ریال خریدنے والوں کیلئے بڑی پیشگوئی
معاشی ماہرین کا کہنا ہے کہ عالمی معاشی صورتحال، امریکی ڈالر کی قدر، مرکزی بینکوں کی پالیسیوں اور سرمایہ کاروں کے رجحانات سونے کی قیمتوں پر براہِ راست اثر انداز ہوتے ہیں، اگر عالمی منڈی میں یہی رجحان برقرار رہا تو آئندہ دنوں میں مقامی مارکیٹ میں بھی سونے اور چاندی کی قیمتوں میں مزید ردوبدل دیکھنے کو مل سکتا ہے۔
