یکم جولائی سے اے ٹی ایم سے رقم نکلوانے والوں کیلئے تاریخی ریلیف
ملائشین میڈیا رپورٹس کے مطابق ملائیشیا میں یکم جولائی سے ملک بھر میں کسی بھی بینک کے اے ٹی ایم یا اسمارٹ ری سائیکلر مشین سے رقم نکالنے پر عائد ایک رنگٹ انٹربینک ودڈراول فیس مکمل طور پر ختم کر دی جائے گی۔
بینکنگ انڈسٹری کی جانب سے جاری مشترکہ اعلامیے میں واضح کیا گیا ہے کہ اس فیصلے کے بعد ملک بھر کے ڈیبٹ کارڈ ہولڈرز 14 ہزار سے زائد اے ٹی ایم اور ایس آر ایم مشینوں سے بغیر کسی اضافی چارج کے جتنی بار چاہیں نقد رقم نکال سکیں گے۔
ایسوسی ایشن آف بینک آف ملائیشیا، ایسوسی ایشن آف اسلامک بینکنگ اینڈ فنانشل انسٹی ٹیوشنز ملائیشیا اور ایسوسی ایشن آف ڈویلپمنٹ فنانس انسٹی ٹیوشنز آف ملائیشیا نے اس فیصلے کو تمام لائسنس یافتہ بینکوں کے لیے نافذ العمل قرار دیا ہے۔
بینکنگ اداروں کے مطابق روزمرہ زندگی میں نقد رقم اب بھی شہریوں کے لیے ایک بنیادی ضرورت ہے، اسی حقیقت کو مدنظر رکھتے ہوئے یہ فیس ختم کی گئی ہے تاکہ عوام پر مالی بوجھ کم کیا جا سکے اور انہیں زیادہ آسان، سستی اور قابلِ اعتماد بینکنگ سہولیات فراہم ہوں۔
یہ بھی پڑھیں: امریکا کیساتھ ڈیل، ایرانی کرنسی کی قدر میں نمایاں اضافہ
بیان میں مزید کہا گیا ہے کہ یہ قدم کسٹمر فرینڈلی بینکنگ سروسز کو بہتر بنانے کی وسیع حکمتِ عملی کا حصہ ہے جس کا مقصد صارفین کے تجربے کو مزید سہل اور مؤثر بنانا ہے۔
ادھر بینکنگ ایسوسی ایشنز نے ملک میں بڑھتی ہوئی ڈیجیٹل اور کیش لیس ادائیگیوں کے رجحان کو بھی مثبت قرار دیتے ہوئے کہا ہے کہ ملائیشیا کو جدید ڈیجیٹل معیشت کی طرف لے جانے کے لیے الیکٹرانک ادائیگیوں کے نظام کو مزید مضبوط اور محفوظ بنایا جا رہا ہے۔
