خام تیل کی قیمتیں گزشتہ تین ماہ کی کم ترین سطح پر آگئیں
ایران اور امریکا کے درمیان معاہدے کے بعد عالمی منڈی میں برطانوی خام تیل کی قیمت میں 3.20 ڈالر فی بیرل کی نمایاں کمی ریکارڈ کی گئی، جس کے بعد اس کی نئی قیمت 79 ڈالر فی بیرل ہو گئی ہے۔
اسی طرح امریکی خام تیل بھی 2.86 ڈالر فی بیرل سستا ہو کر 77 ڈالر فی بیرل کی سطح پر ٹریڈ کر رہا ہے۔
دوسری جانب یو اے ای کا مربن کروڈ آئل بھی عالمی رجحان کے مطابق دباؤ میں ہے اور اس کی قیمت 72 ڈالر فی بیرل کی سطح پر برقرار ہے۔
ماہرین کے مطابق گزشتہ روز بھی عالمی مارکیٹ میں تیل کی قیمتوں میں کمی دیکھی گئی تھی جس کے بعد یہ مسلسل گراوٹ کا سلسلہ برقرار ہے۔
یہ کمی اس وقت سامنے آئی ہے جب ایران اور امریکا کے درمیان ہونے والے معاہدے کے بعد عالمی توانائی مارکیٹ میں غیر یقینی صورتحال کم ہوئی ہے۔
مارکیٹ ذرائع کے مطابق جغرافیائی کشیدگی میں کمی اور سپلائی سے متعلق خدشات میں بہتری نے تیل کی قیمتوں پر اثر ڈالا ہے۔
یہ بھی پڑھیں: جی پی ایکس 125 اور 150 پاکستان میں متعارف، قیمتیں سامنے آگئیں
معاشی ماہرین کا کہنا ہے کہ عالمی سطح پر طلب و رسد کے نئے اندازوں اور سیاسی کشیدگی میں نرمی کے باعث خام تیل کی قیمتیں نیچے آ رہی ہیں، اگر یہی رجحان برقرار رہا تو آنے والے دنوں میں مزید کمی بھی ممکن ہے۔
خام تیل کی عالمی قیمتوں میں اس کمی کے اثرات دنیا بھر کی معیشتوں پر پڑ سکتے ہیں، خاص طور پر تیل درآمد کرنے والے ممالک کو ریلیف ملنے کی توقع ہے۔
