عالمی منڈی میں خام تیل کی قیمتیں گر گئیں

رپورٹس کے مطابق سرمایہ کاروں میں یہ تاثر مضبوط ہوا ہے کہ خطے میں حالیہ تناؤ مزید پھیلنے کے بجائے بتدریج کم ہو سکتا ہے جس کے باعث تیل کی سپلائی سے متعلق خدشات میں کمی آئی اور قیمتیں نیچے آگئیں۔

رپورٹ کے مطابق امریکی خام تیل ویسٹ ٹیکساس انٹرمیڈیٹ، ڈبلیو ٹی آئی کی قیمت میں 3.16 ڈالر فی بیرل کمی ہوئی، جس کے بعد امریکی خام تیل 92.86 ڈالر فی بیرل پر آگیا۔

اسی طرح برطانوی خام تیل برینٹ کروڈ کی قیمت میں بھی بڑی کمی دیکھی گئی، برینٹ خام تیل 3.41 ڈالر فی بیرل سستا ہو کر 94.83 ڈالر فی بیرل پر پہنچ گیا۔

ماہرین کا کہنا ہے کہ مشرق وسطیٰ میں کشیدگی بڑھنے کی صورت میں عالمی منڈی میں تیل کی قیمتیں تیزی سے اوپر جاتی ہیں کیونکہ سرمایہ کاروں کو سپلائی متاثر ہونے کا خدشہ ہوتا ہے تاہم کشیدگی میں کمی کے امکانات قیمتوں پر دباؤ کم کر دیتے ہیں۔

یہ بھی پڑھیں: سونے کی قیمتوں میں اتار چڑھاؤ کا سلسلہ جاری، آج پھر مہنگا ہو گیا

معاشی ماہرین کے مطابق عالمی سطح پر خام تیل کی قیمتوں میں کمی درآمدی ممالک کے لیے مثبت خبر سمجھی جاتی ہے کیونکہ اس سے توانائی کے اخراجات میں کمی کا امکان پیدا ہوتا ہے، تاہم مقامی سطح پر صارفین کو ریلیف ملنے کا انحصار حکومتی پالیسی، ٹیکسز اور کرنسی کی قدر پر بھی ہوتا ہے۔