نان بائیوں نے روٹی کی قیمت میں خود ساختہ اضافہ کر دیا
رپورٹ کے مطابق مارکیٹ میں 20 کلو آٹا کا تھیلا 400 روپے مہنگا ہو گیا جس کے بعد صوبائی دارالحکومت لاہو ر میں روٹی کی قیمت میں اضافہ کر دیا گیا۔
مارکیٹ ذرائع کا بتانا ہے کہ شہر کے مختلف علاقوں میں 14 روپے میں فروخت ہونے والی روٹی اب 20 روپے تک میں بیچی جا رہی ہے۔
نانبائیوں کا کہنا ہے کہ مہنگی ایل پی جی، آٹے اور دیگر اخراجات کے باعث سرکاری نرخ پر روٹی فروخت کرنا ناممکن ہے۔
رہنما نانبائی ایسوسی ایشن آفتاب اسلم گل نے کہا کہ مہنگائی کے پیش نظر 20 روپے میں روٹی فروخت کرنا ان کی مجبوری بن چکا ہے کیونکہ 14 روپے میں روٹی بیچ کر اخراجات بھی پورے نہیں ہو پا رہے۔
یہ بھی پڑھیں: حکومت نے بجلی صارفین کو خوشخبری سنا دی
ان کا کہنا تھا کہ کہ نان روٹی ایسوسی ایشن کی جانب سے متعدد بار حکام کو روٹی کی قیمت میں ردوبدل سے متعلق درخواستیں دی گئیں لیکن ہماری شنوائی نہیں ہو سکی۔
آفتاب اسلم گل نے مطالبہ کیا کہ روٹی کا سرکاری نرخ 20 روپے مقرر کیا جائے تاکہ نانبائیوں اور شہریوں دونوں کے لیے واضح پالیسی بنائی جا سکے۔
