کاروباری ہفتے کے آغاز پر ہی مارکیٹ میں زبردست سرگرمی دیکھی گئی اور خریداری کا رجحان غالب رہا۔
اعداد و شمار کے مطابق ہنڈریڈ انڈیکس میں 12920 پوائنٹس کا نمایاں اضافہ ریکارڈ کیا گیا، جس کے بعد انڈیکس 164594 کی سطح تک جا پہنچا، یہ اضافہ حالیہ عرصے میں سب سے بڑی یومیہ تیزی میں شمار کیا جا رہا ہے۔
گزشتہ روز یہی انڈیکس 151673 پوائنٹس پر بند ہوا تھا، جس کے مقابلے میں آج کا اضافہ غیر معمولی اہمیت رکھتا ہے۔
معاشی ماہرین کا کہنا ہے کہ عالمی سطح پر کشیدگی میں کمی اور جنگ بندی کے فیصلے نے سرمایہ کاروں کے خدشات کو کم کیا ہے، جس کے باعث مارکیٹ میں مثبت رجحان پیدا ہوا، خاص طور پر توانائی، بینکاری اور صنعتی شعبوں میں نمایاں خریداری دیکھنے میں آئی ہے۔
تجزیہ کاروں کا کہنا ہے کہ اگر خطے میں امن کی صورتحال برقرار رہتی ہے تو آئندہ دنوں میں بھی حصص بازار میں استحکام اور بہتری کا سلسلہ جاری رہ سکتا ہے۔ سرمایہ کاروں کی جانب سے طویل مدتی سرمایہ کاری میں دلچسپی بھی بڑھنے کا امکان ظاہر کیا جا رہا ہے۔
یہ بھی پڑھیں:مرغی کی قیمت کو پَر لگ گئے، فی کلو کتنے کا ہوگیا؟
یہ پیش رفت نہ صرف معیشت کے لیے خوش آئند ہے بلکہ ملک میں کاروباری سرگرمیوں کے فروغ کا بھی اشارہ دیتی ہے، جس سے مجموعی معاشی صورتحال مزید مستحکم ہو سکتی ہے۔
