تفصیلات کے مطابق پشاور میں صرف ایک ہفتے کے دوران مرغی کی فی کلو قیمت میں 45 روپے کا بڑا اضافہ ریکارڈ کیا گیا ہے۔ پولٹری منڈی میں زندہ مرغی کی قیمت 405 روپے فی کلو تک پہنچ گئی ہے جس کے باعث گوشت کی قیمتیں بھی اوپر چلی گئی ہیں۔
اسی طرح لاہور کی اوپن مارکیٹ اور رمضان بازاروں میں بھی چکن کی قیمتوں میں مسلسل اضافہ دیکھنے میں آ رہا ہے۔ حالیہ اضافے کے بعد چکن مزید 8 روپے مہنگا ہو کر 519 روپے فی کلو تک پہنچ گیا ہے جبکہ صاف گوشت کی قیمت 600 فی کلو سے بھی تجاوز کر گئی ہے۔
مارکیٹ ذرائع کے مطابق زندہ برائلر کا فارم ریٹ 330 روپے فی کلو مقرر ہے جبکہ تھوک قیمت 344 روپے اور پرچون قیمت 358 روپے فی کلو تک پہنچ چکی ہے۔ اسی طرح فارمی انڈوں کی قیمت میں بھی اضافہ ریکارڈ کیا گیا ہے اور فی درجن قیمت دو روپے اضافے کے بعد 202 روپے ہو گئی ہے۔
یہ بھی پڑھیں:پیٹرول کے بعد ایل پی جی بھی مہنگی
دوسری جانب مہنگائی کا اثر سبزیوں اور پھلوں پر بھی واضح طور پر نظر آ رہا ہے، مختلف سبزیوں کی قیمتوں میں 20 سے 30 روپے فی کلو تک اضافہ ہو چکا ہے، جبکہ پھلوں کی قیمتوں میں بھی 50 روپے فی کلو تک اضافہ دیکھا جا رہا ہے۔
شہریوں کا کہنا ہے کہ عید سے قبل قیمتوں میں اس تیزی نے گھریلو بجٹ کو بری طرح متاثر کر دیا ہے۔
