ذرائع کے مطابق اسپاٹ گولڈ کی قیمت میں 0.7 فیصد اضافہ ہوا اور یہ 04:52 GMT تک 5,362.90 ڈالر فی اونس تک پہنچ گئی۔

یہ تیزی اُس وقت دیکھنے میں آئی جب امریکا اور اسرائیل نے ہفتے کے اختتام پر ایران پر فضائی حملے کیے جس کے بعد سونا گزشتہ سیشن میں چار ہفتوں سے زائد کی بلند ترین سطح تک پہنچ گیا تھا۔

اپریل ڈیلیوری کے لیے امریکی گولڈ فیوچرز میں بھی 1.2 فیصد اضافہ ہوا اور قیمت 5,376.50 ڈالر تک جا پہنچی۔

مارکیٹ تجزیہ کاروں کے مطابق قیمتوں میں اضافے کی بڑی وجہ جاری تنازع سے متعلق غیر یقینی صورتحال ہے۔ کے سی ایم ٹریڈ کے چیف مارکیٹ اینالسٹ ٹم واٹرر کا کہنا ہے کہ تنازع کے دائرہ کار اور دورانیے کے بارے میں غیر واضح صورتحال سونے کی طلب میں اضافے کا باعث بن رہی ہے کیونکہ سرمایہ کار اسے محفوظ پناہ گاہ سمجھتے ہیں۔

یہ بھی پڑھیں: ایران اسرائیل کشیدگی، پیٹرول کی قیمتوں میں حیران کن اضافہ

تجزیہ کاروں کا کہنا ہے کہ تنازع کے طویل علاقائی جنگ میں تبدیل ہونے کے خدشات نے مارکیٹ میں غیر یقینی کو گہرا کر دیا ہے جس کے نتیجے میں سونے اور دیگر محفوظ اثاثوں میں سرمایہ کاری بڑھ رہی ہے۔

صورتحال تاحال غیر واضح ہے اور سرمایہ کار خطے میں ہونے والی پیش رفت پر گہری نظر رکھے ہوئے ہیں کیونکہ کسی بھی مزید کشیدگی کے عالمی منڈیوں پر دور رس اثرات مرتب ہو سکتے ہیں۔