مارکیٹ کے آغاز پر ہی خریداری کا دباؤ بڑھ گیا، جس کے نتیجے میں ہنڈرڈ انڈیکس ایک بار پھر 1 لاکھ 87 ہزار پوائنٹس کی سطح پر بحال ہو گیا، اس تیزی نے مارکیٹ میں مثبت ماحول پیدا کر دیا ہے۔
جاری کردہ اعداد و شمار کے مطابق کاروبار کے آغاز پر پاکستان اسٹاک ایکسچینج کے 100 انڈیکس میں 700 سے زائد پوائنٹس کا نمایاں اضافہ ریکارڈ کیا گیا۔ انڈیکس بڑھ کر 1 لاکھ 87 ہزار 734 پوائنٹس تک پہنچ گیا، جو حالیہ دنوں کی ایک اہم سطح سمجھی جا رہی ہے۔
یاد رہے کہ گزشتہ کاروباری روز کے اختتام پر ہنڈرڈ انڈیکس 1 لاکھ 86 ہزار 900 پوائنٹس پر بند ہوا تھا، تاہم نئے دن کے آغاز پر ہی مارکیٹ نے مضبوط واپسی کی۔ بینکنگ، توانائی اور سیمنٹ سیکٹر میں حصص کی قیمتوں میں اضافے نے مجموعی انڈیکس کو سہارا دیا۔
تجزیہ کاروں کا کہنا ہے کہ معاشی اشاریوں میں بہتری، سرمایہ کار دوست پالیسیوں اور آئندہ مالی اقدامات سے متعلق مثبت توقعات کے باعث اسٹاک مارکیٹ میں تیزی دیکھنے میں آ رہی ہے۔ غیر ملکی سرمایہ کاری میں ممکنہ اضافے کی امید بھی مارکیٹ کے اعتماد کو تقویت دے رہی ہے۔
یہ بھی پڑھیں:سونے اور چاندی کی قیمتوں میں ایک بار پھر اضافہ
دوسری جانب سرمایہ کاروں کی جانب سے محتاط رجحان بھی دیکھا جا رہا ہے، تاہم مجموعی طور پر مارکیٹ کا موڈ مثبت ہے۔
ماہرین کے مطابق اگر یہی رجحان برقرار رہا تو آئندہ دنوں میں اسٹاک مارکیٹ مزید نئی بلندیاں چھو سکتی ہے، جو ملکی معیشت کیلئے ایک خوش آئند اشارہ ہے۔
