پیٹرولیم ڈویژن کی جانب سے جاری نوٹیفکیشن کے مطابق ہائی اسپیڈ ڈیزل کی قیمت میں 11 روپے 30 پیسے فی لیٹر اضافہ کیا گیا ہے۔

اضافے کے بعد ڈیزل کی نئی قیمت 268 روپے 38 پیسے فی لیٹر مقرر کر دی گئی ہے، جبکہ پیٹرول کی قیمت 253 روپے 17 پیسے فی لیٹر پر بدستور برقرار رہے گی۔ پیٹرولیم مصنوعات کی نئی قیمتوں کا اطلاق یکم فروری سے ہو گا، جس کے بعد صارفین کو نئی قیمتوں کے مطابق ادائیگیاں کرنا ہوں گی۔

ڈیزل کی قیمت میں اضافے کا براہ راست اثر ٹرانسپورٹ، زراعت اور اشیائے خورونوش کی قیمتوں پر پڑنے کا خدشہ ہے، کیونکہ ملک میں مال برداری اور زرعی مشینری کا زیادہ تر انحصار ڈیزل پر ہے۔ ایسے میں مہنگائی میں مزید اضافے کا امکان ظاہر کیا جا رہا ہے۔

یہ بھی پڑھیں:سونے کی قیمتوں میں اچانک حیران کن کمی

عوامی حلقوں کی جانب سے ڈیزل کی قیمت بڑھانے پر تشویش کا اظہار کیا جا رہا ہے، خصوصاً ٹرانسپورٹرز اور کسانوں نے اس فیصلے کو مہنگائی میں اضافے کا سبب قرار دیا ہے۔

شہریوں کا کہنا ہے کہ پیٹرول کی قیمت برقرار رکھنا وقتی ریلیف تو ہے، تاہم ڈیزل مہنگا ہونے سے روزمرہ زندگی متاثر ہو سکتی ہے۔

دوسری جانب حکومتی ذرائع کا کہنا ہے کہ عالمی منڈی میں تیل کی قیمتوں، روپے کی قدر اور مالی دباؤ کو مدنظر رکھتے ہوئے یہ فیصلہ کیا گیا ہے۔