آل پاکستان صرافہ جیمز اینڈ جیولرز ایسوسی ایشن کی جانب سے جاری کردہ اعداد و شمار کے مطابق  600 روپے کمی کے بعد ملک بھرمیں فی تولہ سونے کی قیمت 4 لاکھ 66 ہزار 162 روپے ہو گئی۔

اسی طرح 10 گرام سونا بھی 515 روپے سستا ہو کر 3 لاکھ 99 ہزار 658 روپے کی سطح پر آ گیا ہے۔ صرافہ بازاروں میں قیمتوں میں اس کمی کو حالیہ دنوں کی ایک اہم پیش رفت قرار دیا جا رہا ہے۔

معاشی ماہرین کا کہنا ہے کہ مقامی سطح پر سونے کی قیمتوں میں کمی کی ایک بڑی وجہ عالمی مارکیٹ میں سونے کے نرخوں میں کمی ہے۔

ذہن نشین رہے کہ عالمی بازار میں بھی سونے کا بھاؤ 6 ڈالر کم ہو کر 4 ہزار 438 ڈالر فی اونس پر آ گیا ہے، جس کے اثرات مقامی مارکیٹ پر بھی واضح طور پر نظر آ رہے ہیں۔

یہ بھی پڑھیں:چکن کی قیمتوں میں 100 روپے فی کلو اضافہ

تاجروں کا کہنا ہے کہ قیمتوں میں کمی کے باعث صرافہ بازاروں میں خریداروں کی دلچسپی میں اضافہ ہوا ہے، خاص طور پر وہ افراد جو شادی بیاہ یا سرمایہ کاری کیلئے سونا خریدنا چاہتے تھے، اب مارکیٹ کا رخ کر رہے ہیں۔

واضح رہے کہ اگر عالمی سطح پر سونے کی قیمتوں میں استحکام یا مزید کمی کا رجحان برقرار رہا تو مقامی مارکیٹ میں بھی سونے کے نرخ مزید نیچے آ سکتے ہیں۔

دوسری جانب شہریوں کا کہنا ہے کہ مہنگائی کے اس دور میں سونے کی قیمتوں میں کمی ایک مثبت خبر ہے، جو عام خریدار کیلئے کسی حد تک ریلیف کا باعث بن سکتی ہے۔