وفاقی ادارہ شماریات نے ہفتہ وار بنیادوں پر مہنگائی کی رپورٹ جاری کر دی، ہفتہ وار بنیادوں پر ایک ماہ کے بعد مہنگائی کی شرح میں میں معمولی کمی دیکھنے میں آئی، ہفتہ وار مہنگائی کی شرح 0.59 فیصد کی کمی کے بعد سالانہ شرح 4.18 فیصد پر آگئی۔

ادارہ شماریات کی رپورٹ میں بتایا گیا کہ ایک ہفتے میں 18 اشیائے ضروریہ مہنگی جبکہ 12 کی قیمتوں میں کمی ریکارڈ کی گئی۔

رپورٹ کے مطابق ایک ہفتے میں انڈے 8 روپے 33 پیسے فی درجن مزید مہنگے ہو گئے، بڑا گوشت 10 روپے 66 پیسے جبکہ چھوٹا گوشت 2 روپے 52 پیسے فی کلو مہنگا ہوا ،ایک ہفتے میں جلانے والی لکڑی 22 روپے 56 پیسے فی من مہنگی ہوئی، ایک ہفتے میں اڑھائی کلو گھی کا ٹن 2 روپے 37 پیسے مہنگا ہوا۔

یہ بھی پڑھیں: اشیائے خوردونوش کی قیمتوں میں اتار چڑھاؤ جاری

اسی طرح گزشتہ ہفتے کے دوران کیلے 2 روپے86 پیسے فی درجن مہنگے ہوئے ، ایک ہفتے کے دوران 20 کلو آٹے کے تھیلے کی قیمت میں 7 روپے 39 پیسے اضافہ ریکارڈ کیا گیا، ملک میں آٹے کے تھیلے کی اوسط قیمت 2 ہزار 195 روپے 81 پیسے تک پہنچ گئی۔

ادارہ شماریات کی رپورٹ میں بتایا گیا کہ ایک ہفتے کے دوران ٹماٹر 66 روپے 21 پیسے فی کلو سستے ہوئے ، گزشتہ ہفتے کے دوران پیاز 8 روپے 49 پیسے فی کلو سستا ہوا، لہسن 13 روپے، مرغی 2 روپے 21 پیسے فی کلو سستی ہوئی۔

رپورٹ کے مطابق چینی، دال مسور،دال ماش ، دال چنا اور آلو بھی سستی ہونے والی اشیاء میں شامل ہیں جبکہ ایک ہفتے میں 21 اشیائے خورونوش کی قیمتوں میں استحکام رہا۔