ادارہ شماریات کی ہفتہ وار رپورٹ کے مطابق ملک میں مسلسل تیسرے ہفتے بھی مہنگائی بڑھنے کی شرح میں اضافے کا رجحان دیکھا گیا۔

رپورٹ کے مطابق رواں ہفتے کے دوران بھی مہنگائی بڑھنے کی رفتار کی شرح میں 0.49 فیصد اضافہ ہوا ہے جب کہ حالیہ ہفتے سالانہ بنیادوں پر بھی مہنگائی کی شرح بڑھ کر 4.57 فیصد پر پہنچ گئی۔

رپورٹ میں بتایا گیا کہ گزشتہ ہفتے آلو، انڈے، ٹماٹر، پیاز، گھی اور آٹے سمیت 24 اشیائے ضروریہ کے نرخوں میں اضافہ دیکھا کیا گیا جب کہ چاول، دال مونگ، پٹرول، ڈیزل اور دالا چنا سمیت 8 اشیائے ضروریہ کی قیمتوں میں کمی ریکارڈ کی گئی اور 19 اشیائے ضروریہ کی قیمتوں میں استحکام رہا۔

یہ بھی پڑھیں: روٹی، نان اور پراٹھے کی قیمتوں میں ہوشربا اضافہ

ادارہ شماریات کی رپورٹ کے مطابق حالیہ ایک ہفتے میں آلو 0.71 فیصد، انڈے 2.81 فیصد، آٹے کی قیمتوں میں 1.42 فیصد ،پیاز 8.70 فیصد،لہسن 0.85 فیصد، ویجی ٹیبل گھی 0.63 فیصد، ٹماٹر 33.20 فیصد اور واشنگ سوپ کی قیمتوں میں 0.08 فیصد اضافہ ہوا۔

حالیہ ایک ہفتے میں جن اشیائے ضروریہ کی قیمتوں میں کمی آئی ان میں چکن کی قیمتوں میں 6.38 فیصد،دال مونگ کی قیمتوں میں 0.49 فیصد، کیلے کی قیمتوں میں4.70 فیصد، دال چنا 2.20 فیصد، باسمتی ٹوٹا چاول کی قیمتوں میں 0.51 فیصد، پٹرول کی قیمتوں میں 2.09  فیصد اور ہائی اسپیڈ ڈیزل کی قیمت میں 0.55 فیصد کمی واقع ہوئی ہے۔