ذرائع کے مطابق آئی ایم ایف مشن اور حکومت کی معاشی ٹیم کے درمیان ملاقات ہوئی جس میں حکومت کی معاشی ٹیم نے رواں مالی سال کی پہلی سہ ماہی میں کارکردگی پر آئی ایم ایف حکام کو بریفنگ دی ۔
ذرائع کی جانب سے بتایا گیا ہے کہ آئی ایم ایف نے ایک بار پھر پاکستان سے ڈو مور کا مطالبہ کیا ہے۔
ذرائع کا بتانا ہے کہ آئی ایم ایف نے حکومتی اخراجات میں مزید کمی کی تجویز دی ہے، آئی ایم ایف حکام کی جانب سے مطالبہ کیا گیا کہ پبلک سیکٹر پروکیورمنٹ کو مکمل آن لائن اور شفاف بنایا جائے ، وفاقی وزارتوں کی تنظیم نو اور غیر ضروری محکموں بارے جلد فیصلہ کیا جائے ۔
آئی ایم ایف نے حکومت سے پی آئی اے اور ڈسکوز کی نجکاری کے عمل کو تیز کرنے کا بھی مطالبہ کرتے ہوئے کہا کہ نجی شعبے کو کاروبار کے زیادہ سے زیادہ مواقعے فراہم کیے جائیں، بجلی کی خرید و فروخت نجی شعبے کے جلد حوالے کی جائے ۔
ذرائع کے مطابق عالمی مالیاتی فنڈ نے مطالبہ کیا کہ گیس کے گردشی قرض کو ختم کرنے کیلئے پلان تیار کیا جائے ، اسٹیٹ بینک ایل سیز کو ریگولیٹ نہ کرے، درآمدات میں حائل رکاوٹیں دور کی جائیں،ایکسچینج ریٹ کو کنٹرول کرنے کی کوشش نہ کی جائے۔
