آل پاکستان جیمز اینڈ جیولرز ایسوسی ایشن کے مطابق فی تولہ سونے کی قیمت 3 لاکھ 59 ہزار 800 روپے پر مستحکم رہی جبکہ 10 گرام سونے کی قیمت بھی بغیر کسی تبدیلی کے 3 لاکھ 8 ہزار 470 روپے پر موجود ہے۔

ایسوسی ایشن کے مطابق عالمی مارکیٹ میں بھی سونے کی قیمتیں نسبتاً مستحکم ہیں، جہاں فی اونس سونا 3 ہزار 371 ڈالر پر ٹریڈ ہو رہا ہے۔

تجزیہ کاروں کے مطابق مقامی مارکیٹ میں قیمتوں کے مستحکم رہنے کی ایک بڑی وجہ عالمی سطح پر قیمتوں میں محدود اتار چڑھاؤ ہے۔

ماہرین کے مطابق ڈالر کی قدر، خام تیل کی قیمتوں اور عالمی سیاسی و معاشی حالات سونے کی قیمتوں پر اثر انداز ہوتے ہیں، تاہم اس وقت عالمی مارکیٹ میں سرمایہ کار محتاط رویہ اختیار کیے ہوئے ہیں جس کی وجہ سے سونے کی قیمتوں میں استحکام دیکھا جا رہا ہے۔

یہ بھی پڑھیں:وفاقی حکومت کا گاڑیوں کے ٹوکن ٹیکس بڑھانے کا فیصلہ

صرافہ مارکیٹ سے وابستہ تاجروں کا کہنا ہے کہ مقامی سطح پر خرید و فروخت معمول کے مطابق جاری ہے، جبکہ عوام کی بڑی تعداد سرمایہ کاری کے طور پر سونے کو محفوظ تصور کرتی ہے۔

اگر عالمی مارکیٹ میں آنے والے دنوں میں کوئی نمایاں تبدیلی نہ ہوئی تو امکان ہے کہ مقامی مارکیٹ میں بھی قیمتیں اسی سطح پر برقرار رہیں گی۔