میڈیا رپورٹس کے مطابق وفاقی ادارہ شماریات کی دستاویز میں بتایا گیا ہے کہ حالیہ ایک ہفتے کے دوران سیالکوٹ میں 20 کلو کے آٹے کے تھیلے کی قیمت میں 217 روپے تک اضافہ ہوا جبکہ صوبائی دارالحکومت لاہور ، گوجرانوالہ، ملتان اور بنوں میں قیمت200 روپے تک بڑھ گئی۔

ادارہ شماریات کی رپورٹ کے مطابق بہاولپور میں 20 کلو آٹے کا تھیلا 193 روپے 34 پیسے، راولپنڈی میں 187 روپے67 پیسے، اسلام آباد میں 173 روپے 33 پیسے، سرگودھا میں 173 روپے، سکھر میں 160 روپے، کوئٹہ میں 130 روپے جبکہ کراچی اور سکھر میں 100 روپے مہنگا ہوا۔

اسی طرح پشاور میں 20 کلو آٹےکے تھیلےکی قیمت میں 50 روپے تک کا اضافہ ریکارڈ کیا گیا ہے۔

ادارہ شماریات کی دستاویز میں بتایا گیا کہ قیمتوں میں اضافے کے بعد راولپنڈی میں 20 کلو آٹےکا تھیلا ایک ہزار 786 روپے67 پیسے، کوئٹہ میں ایک ہزار 690 روپے ، حیدر آباد میں ایک ہزار 680 روپے اورسیالکوٹ ایک ہزار 667 روپے کا ہو گیا۔

یہ بھی پڑھیں: ایک ہفتے میں سبز مصالحہ جات سمیت 18 اشیائے ضروریہ مہنگی

ملتان میں آٹے کے بیس کلو کے تھیلے کی قیمت ایک ہزار 666 روپے 66 پیسے، بہاولپور میں ایک ہزار 660 روپے ، پشاور اور بنوں میں ایک ہزار 650 روپے پر پہنچ گئی۔

اسی طرح گوجرانوالہ میں ایک ہزار 650 روپے ، فیصل آباد اور سرگودھا میں ایک ہزار 640 روپے ، جبکہ لاہور اورخضدار میں آٹےکا بیس کلو کا تھیلا 1600 تک فروخت ہو رہا ہے جبکہ سکھر میں 20 کلو آٹے کا تھیلا ایک ہزار 560 روپے اور لاڑکانہ میں 1500 روپے تک بیچا جارہا ہے۔

دوسری جانب آٹے کی قیمتوں میں حالیہ اضافے کے پیش نظر صوبائی دارالحکومت لاہور سمیت پنجاب بھر میں نان بائیوں نے روٹی اور نان کی قیمتوں میں بھی اضافےکا عندیہ دے دیا ہے۔

ذرائع کے مطابق نان اور روٹی کی قیمتوں میں 2 روپے تک اضافے کا امکان ہے۔