اس ہفتے مہنگائی کی شرح 0.31 فیصد بڑھ کر 2.21 فیصد تک پہنچ گئی۔

رپورٹس کے مطابق ملک کے مختلف شہروں میں چینی کی قیمتیں سرکاری نرخنامے سے زیادہ وصول کی جا رہی ہیں۔ اسلام آباد، پشاور اور کراچی میں چینی 173 روپے فی کلو کے بجائے 190 روپے فی کلو تک فروخت ہو رہی ہے، جو کہ سرکاری نرخوں کی کھلی خلاف ورزی ہے۔

واضح رہے کہ گزشتہ ہفتے کے دوران 17 اشیائے ضروریہ کی قیمتوں میں اضافہ، 9 اشیا کی قیمتوں میں کمی اور 24 اشیا کے نرخ مستحکم رہے۔

مہنگی ہونے والی اشیا میں ٹماٹر، چکن، انڈے، پیاز، لہسن، گندم کا آٹا، گڑ، دال ماش اور لکڑی شامل ہیں۔

یہ بھی پڑھیں: خام تیل کی قیمتوں میں کمی کا سلسلہ جاری

جاری کردہ اعداد و شمار کے مطابق ٹماٹر 10 روپے 42 پیسے فی کلو، چکن 19 روپے 67 پیسے فی کلو اور انڈے فی درجن 6 روپے 19 پیسے مہنگے ہوئے، جبکہ چینی کی قیمت فی کلو 52 پیسے بڑھ گئی۔ گندم کا آٹا فی تھیلا 21 روپے 18 پیسے مہنگا ہوا۔

دوسری جانب کیلے، آلو، دال چنا، مونگ، مسور، گھی، نمک، چاول اور ایل پی جی سستی ہونے والی اشیا میں شامل رہیں۔ کیلے فی درجن تقریباً 4 روپے، آلو فی کلو 1 روپے 37 پیسے سستے ہوئے، جبکہ ایل پی جی کا گھریلو سیلنڈر 10 روپے 39 پیسے کم ہو گیا۔

تازہ دودھ، دہی، سگریٹ، بریڈ سمیت 25 اشیا کی قیمتوں میں کوئی تبدیلی نہیں آئی۔