ایف بی آر کے مطابق سیلز ٹیکس رجسٹرڈ افراد کا ایف بی آر کمپیوٹرائزڈ سسٹم سے منسلک ہونا لازمی قرار دیا گیا ہے کہ بزنس پوائنٹ کی نگرانی کیلئے سی سی ٹی وی کیمرے نصب کیے جائیں گے، ڈیبٹ، کریڈٹ کارڈ مشین، کیو آر کوڈ، ڈیجیٹل ادائیگیوں کو ایف بی آر سے لازمی لنک کرنا ہوگا۔

اشیاء کی آن لائن فروخت کیلئے ویب سائٹ، سافٹ ویئر، موبائل ایپلی کیشن بھی لنک ہوں گی، انٹیگریٹڈ شخص ٹیکس افسر کو کاروباری احاطے، ریکارڈ تک رسائی دینے کا پابند ہوگا ، الیکٹرانک سسٹم سے چھیر چھاڑ کرنے والے کو جرمانے اور پابندیوں کا سامنا کرنا پڑے گا ۔

ایف بی آر کی جانب سے انٹرنیٹ یا بجلی کی بندش کی صورت میں انوائسز24 گھنٹے کے اندر اپ لوڈ کرنا لازمی قرار دیا گیا ہے۔

یہ بھی پڑھیں: ایف بی آر نے سیلز ٹیکس ایکٹ کے سیکشن 37 اے بارے طریقہ کار جاری کر دیا

فیڈرل بورڈ آف ریونیو کی جانب سے کہا گیا ہے کہ ٹیکس چوری کی روک تھام کیلئے انفورسمنٹ نیٹ ورک قائم کیا جائے گا، کیو آر کوڈ یا ایف بی آر نمبر کے بغیر انوائسز جاری کرنے پر قانونی کارروائی کی جائے گی ، سیلز ٹیکس انوائس ڈیجیٹل دستخط، کیو آر کوڈ، ایف بی آر کے منفرد نمبر پر مشتمل ہوگی ۔

ایف بی آر کے مطابق یومیہ، ہفتہ وار اور ہر مہینے کے آخر میں الیکٹرانک انوائسز کا ریکارڈ مرتب کرنا ہوگا، ڈیجیٹل انوائسز یا آن لائن فروخت کی انوائسز کا ڈیٹا چھ سال تک محفوظ رکھنا لازم ہو گا۔