آل پاکستان جیمز اینڈ جیولرز ایسوسی ایشن کے مطابق آج منگل کے روز سونے کی فی تولہ قیمت میں 5 ہزار 900 روپے کا بڑا اضافہ ہوا جس کے بعد ملکی صرافہ بازاروں میں فی تولہ سونا ملکی تاریخ میں پہلی بار 3 لاکھ 63 ہزار 700 روپے کی نئی بلند ترین سطح پر پہنچ گیا۔

جیولرز ایسوسی ایشن کی جانب سے بتایا گیا ہے کہ ملکی صرافہ بازاروں میں 10گرا م سونے کی قیمت میں بھی 5 ہزار 59 روپے کا اضافہ ہوا جس کے بعد پاکستان میں 10 گرام سونے کی قیمت پہلی بار 3 لاکھ 11 ہزار 814 روپے پر جا پہنچی۔

اسی طرح عالمی صرافہ بازاروں میں سونے کی فی اونس قیمتوں میں تیزی دیکھی جارہی ہے، عالمی صرافہ مارکیٹ میں آج فی اونس سونے کی قیمت میں 59 ڈالر کا اضافہ ہوا جس کے بعد بین الاقوامی صرافہ بازاروں میں سونا پہلی بار 3454 ڈالر فی اونس پر فروخت ہو رہا ہے۔

یہ بھی پڑھیں: چار ماہ کے دوران سونے کی قیمت میں کتنا اضافہ ہوا؟

یہ اضافہ عالمی مارکیٹ کی صورتحال اور سونے کی مانگ میں اضافے کا نتیجہ ہے، چند دن قبل عالمی مارکیٹ میں سونے کی فی اونس قیمت 3150 ڈالرز کے قریب تھی، جو اب بڑھ کر 3454 ڈالرز فی اونس تک جا پہنچی ہے، جس سے سونے کی قیمتوں میں مزید اضافے کا امکان ظاہر ہو رہا ہے۔

پاکستانی مارکیٹ میں سونے کی بڑھتی ہوئی قیمتوں کا اثر عام لوگوں پر بھی پڑ رہا ہے، خاص طور پر وہ لوگ جو شادیوں یا دیگر تقریبات کیلئے سونا خریدنے کی منصوبہ بندی کر رہے تھے۔

اقتصادی ماہرین کے مطابق عالمی اقتصادی صورتحال اور سونے کی بڑھتی ہوئی مانگ کے پیش نظر مزید قیمتوں میں اضافہ ہو سکتا ہے۔