بھارتی میڈیا کے مطابق آئی پی ایل منتظمین اور غیر ملکی کھلاڑی غیر یقینی صورتحال پر شدید پریشان ہیں اور بھارتی کرکٹ بورڈ جلد میچز کی معطلی سے متعلق تفصیلات جاری کرے گا۔
گزشتہ روز دھرمشالہ اسٹیڈیم میں پنجاب کنگز اور دہلی کیپٹل کے درمیان جاری میچ کے گیارہویں اوور میں اچانک میچ روک دیا گیا۔ ابتدائی طور پر فلڈ لائٹس میں خرابی کا بہانہ بنایا گیا لیکن کچھ دیر بعد حکام نے محدود شرکاء کے سامنے میچ منسوخ کرنے کا اعلان کر دیا۔ تماشائیوں کی بڑی تعداد گراؤنڈ میں موجود تھی جنہیں فوری طور پر خالی کروایا گیا۔
یہ بھی پڑھیں:پی ایس ایل کے میچز کراچی منتقل کرنے کا حتمی فیصلہ
دھرمشالہ ائیرپورٹ کی بندش اور بھارتی حکام کی جانب سے حفاظتی انتظامات میں کوتاہی کے باعث ممبئی انڈینز اور کنگز الیون پنجاب کے میچ کو بھی نئی منزل کی تلاش پر مجبور ہونا پڑا۔ بھارتی ذرائع ابلاغ کا کہنا ہے کہ 11 مئی کو احمد آباد میں شیڈول میچ اسی مقام پر منتقل کیا گیا ہے، جہاں اب کھلاڑی اور انتظامیہ دونوں خاموشی سے روانگی کا انتظام کر رہے ہیں۔
غیر ملکی کھلاڑیوں نے آئی پی ایل کے مستقبل پر شکوک کا اظہار کیا ہے اور کئی ٹیموں نے محفوظ ماحول نہ ہونے کے باعث خود اختیاری چھٹیوں یا دورے منسوخ کرنے پر غور شروع کر دیا ہے۔
ماہرین کا کہنا ہے کہ اگر پاکستان اور بھارت کے درمیان کشیدگی میں کمی نہ آئی تو آئی پی ایل کی ساکھ اور مالی مستقبل دونوں شدید خطرے میں پڑ جائیں گے۔
