کیری ڈبہ بائے بائے، پروڈکشن بند
September, 19 2024
لاہور:(ویب ڈیسک) مشہور کیری ڈبہ سوزوکی بولان کا پاکستان میں سفر اختتام پذیر ہو گیا ہے۔
یہ خبریں پچھلے چند سالوں سے گردش کر رہی تھیں کہ اسے بند کر دیا جائے گا، لیکن اب یہ باضابطہ طور پر اعلان ہو چکا ہے کہ سڑکوں پر مزید کوئی نیا بولان نظر نہیں آئے گا۔
سوشل میڈیا پر ایک تصویر کے بعد یہ خبر وائرل ہوئی، جس میں ادھوری گاڑی کے ساتھ ایک پوسٹر لگا ہوا تھا جس پر لکھا تھا: "بائے بائے Y88V بولان، پیداوار کا اختتام، آخری چیسز نمبر 01151691"۔
تو یوں سوزوکی بولان کا خاتمہ ہو گیا، اور اب سڑکوں پر اس کی جگہ جلد ہی نئی سوزوکی ایوری لے لے گی۔
یہ پاکستانی صارفین کے لیے ایک طویل انتظار تھا کیونکہ یہ گاڑی واقعی پرانی ہو چکی تھی، جس میں کوئی خاص خصوصیات اور حفاظتی اقدامات نہیں تھے۔
پاکستانی صارفین اسے صرف اس لیے خرید رہے تھے کیونکہ کوئی اور بہتر آپشن دستیاب نہیں تھا، جب تک کہ چنگان کارواں کی لانچ نہیں ہوئی تھی۔
سوزوکی بولان کو اس کے پرانے ڈیزائن، آرام دہ سیٹنگ کی کمی اور سڑک پر خطرناک ہونے کی وجہ سے تنقید کا نشانہ بنایا جاتا رہا ہے۔
صارفین طویل عرصے سے اس کے متبادل کا مطالبہ کر رہے تھے اور ایسا لگتا ہے کہ سوزوکی نے بالآخر ان کی بات سنی۔
سوزوکی بولان کا متبادل 2021 ءمیں یہ توقع کی جا رہی تھی کہ لاہور ہائی کورٹ کے فیصلے کے بعد کمپنی اسے بند کر دے گی، جس میں انجینئرنگ ڈیولپمنٹ بورڈ کو ہدایت کی گئی تھی کہ وہ یقینی بنائے کہ تمام کار کمپنیاں ایئر بیگز کے ساتھ گاڑیاں اسمبل کریں۔
تاہم، اُس وقت کمپنی نے ان افواہوں کو مسترد کر دیا تھا۔ پھر 2022 ء میں، کمپنی نے سوزوکی بولان کا اے سی ویریئنٹ متعارف کروایا، جو بدقسمتی سے بہت کم عرصے تک چلا اور اُسی سال بند کر دیا گیا۔
اب سوال یہ ہے کہ اس "لیجنڈری" بولان یا "کیری ڈبہ" کو کون سی گاڑی تبدیل کرے گی؟ جیسا کہ پہلے ذکر کیا گیا، اس کا جواب سادہ ہے: سوزوکی ایوری۔ کمپنی نے لاہور کے آخری آٹو شو میں مقامی لانچ کے لیے نئی ایوری کا انکشاف کیا تھا، لیکن مختلف وجوہات کی بنا پر اس کی لانچ میں تاخیر ہوتی رہی، جن میں ایل سی کی پابندی اور بعد ازاں سی کے ڈی کٹس کی درآمد بھی شامل تھی۔
اس بات کی تصدیق ہو چکی ہے کہ کمپنی اکتوبر 2024 کے دوسرے ہفتے میں نئی سوزوکی ایوری لانچ کرے گی، جس کا مطلب ہے بولان کا اختتام اور ایوری کا نیا سفر شروع ہو چکا ہے۔
