پاکستان سمیت 8 ممالک کی جانب سے فلسطینیوں کی غزہ سے بدخلی کے اسرائیلی بیانات مسترد
پاکستان، مصر، انڈونیشیا، اردن، قطر، سعودی عرب، ترکیہ اور متحدہ عرب امارات کے وزرائے خارجہ کی جانب سے جاری مشترکہ اعلامیے میں کہا گیا ہے کہ فلسطینیوں کو ان کی سرزمین سے بے دخل کرنے کے منصوبے بین الاقوامی قانون کی خلاف ورزی ہیں۔
اعلامیے میں کہا گیا کہ فلسطینیوں کی جبری بے دخلی کی کسی بھی کوشش یا منصوبے کو مسترد کرتے ہیں، جبکہ ایسی کوششیں خطے کے امن اور استحکام کو نقصان پہنچا سکتی ہیں۔
آٹھ ممالک نے واضح کیا کہ غزہ مقبوضہ فلسطینی علاقے کا اٹوٹ حصہ ہے اور غزہ، مغربی کنارے اور مقبوضہ بیت المقدس پر مشتمل فلسطینی سرزمین کے اتحاد کو برقرار رکھا جانا چاہیے۔
مشترکہ اعلامیے میں کہا گیا کہ منصفانہ اور پائیدار امن کے حصول کا واحد راستہ دو ریاستی حل ہے۔ 4 جون 1967 کی سرحدوں پر ایک آزاد فلسطینی ریاست کا قیام عمل میں آنا چاہیے، جس کا دارالحکومت مقبوضہ بیت المقدس ہو۔
آٹھ ممالک نے فلسطینی عوام کی اپنی سرزمین پر ثابت قدمی کی مکمل حمایت کا اعادہ کرتے ہوئے فلسطینیوں کے جائز حقوق کو نقصان پہنچانے کی تمام کوششوں کو مسترد کردیا۔
