نیپال اور چین کی سرحد پر تباہ کن سیلاب کے نتیجے میں متعدد افراد ہلاک، سینکڑوں سیاح لاپتا

نیپال میں کئی مکانات، سڑکیں اور بجلی کے منصوبے سیلابی ریلے میں بہہ گئے ہیں جبکہ دوسری جانب تبت کے حکام نے بتایا ہے کہ سرحدی گزرگاہ پر مٹی کا تودہ گرنے کے بعد 'گیرونگ' کاؤنٹی میں بڑے پیمانے پر جانی نقصان کا خدشہ ہے۔

چینی سرکاری خبر رساں ایجنسی کے مطابق مٹی کا تودہ نیپالی سرحد کی جانب گرا جس نے گیرونگ پورٹ کو متاثر کیا اور سرحدی علاقے میں سڑکوں، مواصلات اور بجلی کی تنصیبات کو نقصان پہنچایا۔

یہ بھی پڑھیں: ٹرمپ انتظامیہ نے دنیا بھر سے ویزا اپائنٹمنٹس عارضی طور پر روک دی

نیپال کی ٹورازم اتھارٹی کے مطابق متاثرہ علاقے میں کم از کم 384 سیاح لاپتا ہیں جن میں 105 بھارتی، 93 نیپالی، 12 برطانوی اور 3 امریکی شہری شامل ہیں۔

چینی سرکاری نشریاتی ادارے 'سی سی ٹی وی' کے مطابق حکام نے گیرونگ لینڈ کراسنگ پر کم از کم 574 امدادی کارکنوں کو تعینات کر دیا ہے، ایک امدادی کارکن نے بتایا کہ متاثرہ علاقے تک جانے والے راستوں پر مٹی اور ملبے کی 5 فٹ موٹی تہہ جمع ہے جس کی وجہ سے ٹیموں کو جائے وقوعہ تک پہنچنے میں کم از کم 4 گھنٹے لگ رہے ہیں۔