ٹرمپ نے ایران پر حملوں کی ویڈیو جاری کر دی
صدر ٹرمپ نے حملوں کی ویڈیو اپنے سوشل میڈیا پلیٹ فارم ٹروتھ سوشل پر شیئر کی، جس میں بندر عباس کے مختلف مقامات پر دھماکوں اور فضائی کارروائیوں کے مناظر دکھائے گئے ہیں، تاہم ویڈیو کی آزاد ذرائع سے فوری تصدیق سامنے نہیں آ سکی۔
امریکا نے ایران پر یہ تازہ حملے ایسے وقت میں کیے جب بڑی تعداد میں ایرانی شہری سابق سپریم لیڈر آیت اللہ علی خامنہ ای کی نماز جنازہ اور آخری رسومات میں شرکت کیلئے سڑکوں پر موجود تھے۔
ایرانی میڈیا کے مطابق بندر عباس، سیریک اور جزیرہ قشم میں متعدد دھماکوں کی آوازیں سنی گئیں، الجزیرہ کی رپورٹ کے مطابق حکام نے بتایا کہ جزیرہ قشم میں کم از کم 6، سیریک میں 7 سے 9 جبکہ بندر عباس میں 10 دھماکوں کی اطلاعات موصول ہوئیں۔
امریکی سینٹرل کمانڈ (سینٹکام) نے اپنے بیان میں دعویٰ کیا کہ امریکی فوج نے ایران میں حالیہ کارروائیوں کے دوران 80 سے زائد اہداف کو نشانہ بنایا، یہ حملے آبنائے ہرمز میں تین بحری جہازوں پر مبینہ حملوں کے جواب میں کیے گئے۔
Posted by President Trump on Truth Social pic.twitter.com/XVr2jsrxsN
— Just Trump on Truth (@JustTrumpTruth) July 8, 2026
یہ بھی پڑھیں:امریکا نے ایران کی تیل برآمدات پر دوبارہ پابندیاں عائد کر دیں
دوسری جانب ایران نے تجارتی جہازوں پر حملوں سے متعلق امریکی الزامات کو مسترد کرتے ہوئے انہیں مشکوک قرار دیا ہے۔ تہران کا کہنا ہے کہ اس حوالے سے کیے گئے دعوے حقائق پر مبنی نہیں۔
تجزیہ کاروں کے مطابق امریکا اور ایران کے درمیان بڑھتی ہوئی کشیدگی عالمی توانائی کی منڈی اور آبنائے ہرمز کی صورتحال پر بھی اثر انداز ہو سکتی ہے۔
