ایران کی مسلم ممالک کا طاقتور اتحاد بنانے کی تجویز
ایرانی میڈیا رپورٹس کے مطابق یہ تجویز اسلام آباد کے دورے کے دوران پیش کی گئی، صدر مسعود پزشکیان نے پاکستان کی عسکری قیادت سے اہم ملاقات کی۔ اس موقع پر انہوں نے پاکستان کے سفارتی کردار، امن کیلئے کوششوں اور خطے میں ثالثی کے مثبت اقدامات کو سراہا۔
ملاقات کے دوران انہوں نے کہا کہ اسلامی دنیا میں بے پناہ سیاسی، معاشی اور انسانی صلاحیت موجود ہے، اگر مسلم ممالک ایک مشترکہ پلیٹ فارم پر متحد ہو جائیں تو نہ صرف علاقائی بحرانوں پر قابو پایا جا سکتا ہے بلکہ ترقی کے نئے دروازے بھی کھل سکتے ہیں۔
انہوں نے اس بات پر زور دیا کہ ایران اور پاکستان کے تعلقات اب سیاسی، اقتصادی اور اسٹریٹجک تعاون کے ایک نئے مرحلے میں داخل ہو رہے ہیں، جس سے دونوں ممالک کے درمیان روابط مزید مضبوط ہوں گے۔
دوسری جانب پاکستان کی عسکری قیادت کی جانب سے فیلڈ مارشل عاصم منیر نے ایرانی صدر کو خطے کی تازہ صورتحال اور اہم سفارتی پیش رفت سے آگاہ کیا۔ انہوں نے کہا کہ پاکستان اس مؤقف پر یقین رکھتا ہے کہ کسی بھی مسلمان ملک کو مشکلات یا مصائب کا سامنا اکیلے نہیں کرنا چاہیے۔
یہ بھی پڑھیں:رواں سال ایک ہزار عمرہ زائرین شاہی مہمان بنیں گے
فیلڈ مارشل عاصم منیر نے اس موقع پر اس بات پر بھی زور دیا کہ ایران نے حالیہ حالات میں ثابت قدمی دکھاتے ہوئے اپنے مؤقف کا مؤثر انداز میں دفاع کیا ہے، جو خطے کے دیگر ممالک کے لیے بھی ایک اہم پیغام ہے۔
ملاقات کو خطے میں امن، تعاون اور مسلم ممالک کے درمیان اتحاد کے فروغ کی جانب ایک اہم پیش رفت قرار دیا جا رہا ہے۔
