7.1 شدت کا تباہ کن زلزلہ، ہزاروں ہلاکتوں کا خدشہ
غیر ملکی میڈیا رپورٹس کے مطابق زلزلے کے شدید جھٹکے دارالحکومت کاراکاس سمیت ملک کے مختلف شہروں میں محسوس کیے گئے، جس کے باعث شہریوں میں خوف و ہراس پھیل گیا۔ زلزلے کی شدت اتنی زیادہ تھی کہ متعدد رہائشی و تجارتی عمارتیں زمین بوس ہو گئیں جبکہ کئی مکانات مکمل طور پر ملبے کا ڈھیر بن گئے۔
وینزویلا کی حکومت نے متاثرہ علاقوں میں ہنگامی حالت نافذ کرتے ہوئے امدادی سرگرمیاں تیز کرنے کا حکم دے دیا۔
عبوری صدر ڈیلسی روڈریگیز نے زلزلے سے متاثرہ خاندانوں سے اظہارِ تعزیت کرتے ہوئے متعلقہ اداروں کو فوری امدادی کارروائیاں جاری رکھنے کی ہدایت کی ہے۔
دوسری جانب مائیکیٹیا انٹرنیشنل ایئرپورٹ کو پہنچنے والے نقصان کے باعث عارضی طور پر بند کر دیا گیا، جبکہ کئی علاقوں میں بجلی اور انٹرنیٹ سروس بھی معطل ہو گئی ہے۔ ریسکیو ٹیمیں ملبے تلے دبے افراد کی تلاش اور زخمیوں کو محفوظ مقامات پر منتقل کرنے میں مصروف ہیں۔
یہ بھی پڑھیں:چین، جاپان اور شمالی کوریا ایرانی تیل کے بڑے خریدار بن گئے
امریکی جیولوجیکل سروے کے مطابق زلزلے کے نتیجے میں بڑے پیمانے پر جانی و مالی نقصان کا خدشہ ہے۔ ادارے نے خدشہ ظاہر کیا ہے کہ ہلاکتوں کی تعداد 10 ہزار سے تجاوز کر سکتی ہے۔
زلزلے کے جھٹکے پڑوسی ملک کولمبیا میں بھی محسوس کیے گئے، جس کے باعث پورے خطے میں تشویش کی لہر دوڑ گئی ہے۔
