برازیل میں دو ہیلی کاپٹر ٹکرا کر تباہ، تمام افراد ہلاک
غیر ملکی میڈیا رپورٹس کے مطابق یہ واقعہ اس وقت پیش آیا جب دونوں ہیلی کاپٹر معمول کی پرواز پر تھے اور اچانک ٹکراؤ کا شکار ہو گئے۔
میڈیا رپورٹس کے مطابق حادثہ ریو ڈی جنیرو کے گنجان فضائی روٹ پر پیش آیا جہاں دو ہیلی کاپٹر غیر متوقع طور پر ایک دوسرے سے ٹکرا گئے۔
رپورٹس میں بتایا گیا کہ تصادم اس قدر شدید تھا کہ ایک ہیلی کاپٹر موقع پر ہی آگ کے شعلوں میں لپٹ گیا جبکہ دوسرا کنٹرول کھو کر زمین کی طرف گرنے لگا۔
حکام کے مطابق حادثے کے بعد گرنے والا ایک ہیلی کاپٹر سیدھا شہر کے ایک الیکٹرک کار پارکنگ ایریا میں آ گرا، جس کے نتیجے میں وہاں کھڑی متعدد گاڑیاں بھی آگ کی لپیٹ میں آ گئیں۔
ابتدائی معلومات کے مطابق پارکنگ میں موجود تقریباً 20 گاڑیاں مکمل طور پر جل کر خاکستر ہو گئیں۔
واقعہ کی اطلاع ملتے ہی ریسکیو ادارے فوری طور پر موقع پر پہنچے اور آگ پر قابو پانے کی کوششیں شروع کر دیں تاہم دونوں ہیلی کاپٹروں میں سوار افراد کو بچایا نہ جا سکا، حکام نے تصدیق کی ہے کہ حادثے میں مجموعی طور پر 6 افراد ہلاک ہوئے۔
یہ بھی پڑھیں: امریکی فوجی لڑاکا طیارہ گر کر تباہ
برازیلی حکام نے واقعے کی تحقیقات شروع کر دی ہیں تاکہ یہ معلوم کیا جا سکے کہ دونوں ہیلی کاپٹر ایک ہی فضائی راستے پر کیسے آئے اور ٹکراؤ کی اصل وجہ کیا تھی، ابتدائی طور پر تکنیکی خرابی یا انسانی غلطی سمیت مختلف پہلوؤں کا جائزہ لیا جا رہا ہے۔
حادثے کے بعد علاقے میں خوف و ہراس پھیل گیا جبکہ فضائی ٹریفک کو عارضی طور پر معطل کر دیا گیا ہے،حکام نے کہا ہے کہ مکمل رپورٹ آنے کے بعد مزید تفصیلات جاری کی جائیں گی۔
