امریکا نے ایران کے جزیرہ قشم اور بندرعباس پر حملہ کردیا
برطانوی خبر ایجنسی کے مطابق امریکا نے ایران کے اہم جزیرہ قشم اور بندرگاہ بندر عباس کو نشانہ بنایا ہے، جس کے بعد متعدد دھماکوں کی آوازیں سنی گئیں۔
امریکی ٹی وی چینل نے ایک سینئر امریکی عہدے دار کے حوالے سے دعویٰ کیا کہ ان حملوں کا مقصد جنگ کا دوبارہ آغاز یا جنگ بندی کا خاتمہ نہیں۔
رپورٹ کے مطابق امریکا اس وقت ایران کی جانب سے اپنی تجاویز پر ردعمل کا انتظار کر رہا ہے، تاہم اسی دوران یہ کارروائی کی گئی جس نے عالمی توجہ حاصل کر لی۔
چینی خبر ایجنسی سن ہوا نے ایرانی میڈیا کے حوالے سے بتایا کہ قشم جزیرے میں ایک لنگرگاہ کو نشانہ بنایا گیا، جبکہ ایرانی خبر ایجنسی فارس کے مطابق بندر عباس اور قشم جزیرے میں زوردار دھماکے سنے گئے۔ فارس نیوز کا کہنا ہے کہ بندر عباس میں سنائی دینے والی آوازیں ایرانی فضائی دفاعی نظام کی کارروائی کا نتیجہ تھیں۔
یہ بھی پڑھیں:پاکستان کی درخواست پر ٹرمپ نے پروجیکٹ فریڈم روک دیا
تاحال ایرانی حکام کی جانب سے حملوں میں ہونے والے ممکنہ نقصان یا جانی خسارے کی تفصیلات جاری نہیں کی گئیں، تاہم خطے میں بڑھتی ہوئی کشیدگی کے باعث عالمی برادری میں تشویش پائی جا رہی ہے۔ سیاسی و دفاعی ماہرین کا کہنا ہے کہ اگر صورتحال مزید بگڑی تو اس کے اثرات پورے مشرقِ وسطیٰ پر پڑ سکتے ہیں۔
