پاکستان کی درخواست پر ٹرمپ نے پروجیکٹ فریڈم روک دیا
صدر ٹرمپ نے اپنے سوشل میڈیا پلیٹ فارم پر جاری بیان میں کہا کہ پاکستان سمیت مختلف ممالک کی درخواست اور ایران کیخلاف حالیہ فوجی کارروائیوں میں کامیابی کے بعد یہ فیصلہ کیا گیا ہے۔
انہوں نے کہا کہ ایران کے نمائندوں کے ساتھ ایک مکمل اور حتمی معاہدے کی جانب نمایاں پیش رفت ہو چکی ہے، جس کے باعث حالات میں بہتری کی امید پیدا ہوئی ہے۔
امریکی صدر نے واضح کیا کہ اگرچہ آبنائے ہرمز میں ناکہ بندی بدستور برقرار رہے گی، تاہم جہازوں کی محفوظ آمد و رفت سے متعلق پروجیکٹ فریڈم کو وقتی طور پر معطل کیا جا رہا ہے تاکہ مذاکرات کو حتمی شکل دینے کا موقع مل سکے، آنے والے دنوں میں صورتحال مزید واضح ہو جائے گی۔
دفاعی اور سفارتی ماہرین کے مطابق یہ اقدام خطے میں کشیدگی کم کرنے کی ایک بڑی کوشش ہو سکتا ہے، جس کے عالمی معیشت پر بھی اثرات مرتب ہوں گے، خاص طور پر تیل کی ترسیل اور قیمتوں میں استحکام کے امکانات پیدا ہو سکتے ہیں۔
یاد رہے کہ آبنائے ہرمز دنیا کی اہم ترین سمندری گزرگاہوں میں شمار ہوتی ہے، جہاں سے عالمی تیل کی بڑی مقدار گزرتی ہے۔
یہ بھی پڑھیں:آبنائے ہرمز میں جنوبی کوریا کے جہاز پر دھماکے کے بعد آگ لگ گئی
سفارتی حلقوں کا کہنا ہے کہ یہ پیش رفت ایران اور امریکا کے درمیان جاری کشیدگی کے خاتمے کی طرف ایک اہم قدم ہو سکتی ہے، تاہم صورتحال تاحال غیر یقینی ہے اور آئندہ چند دن نہایت اہم سمجھے جا رہے ہیں۔
